ایران نے آبنائے ہرمز کو ایٹم بموں سے زیادہ ضروری قرار دے دیا

ایرانی سپریم لیڈر کے عسکری مشیر اور پاسدارانِ انقلاب (IRGC) کے سابق سربراہ محسن رضائی نے امریکہ اور اسرائیل کو سخت وارننگ دیتے ہوئے کہا ہے کہ اسٹریٹجک آبی گزرگاہ ‘آبنائے ہرمز’ درجنوں ایٹم بموں سے زیادہ اہمیت کی حامل ہے اور ایران اس کے تحفظ کے لیے مکمل طور پر پرعزم ہے۔

ایک اہم باضابطہ بیان میں محسن رضائی نے امریکہ اور اسرائیل کی قیادت کو کڑی تنقید کا نشانہ بناتے ہوئے کہا کہ اگر دشمن خطے میں رہنماؤں کے قتل کے کلچر کو فروغ دے گا، تو دنیا میں کسی بھی ملک کی سلامتی کی کوئی ضمانت نہیں رہے گی۔ انہوں نے سخت لہجے میں کہا کہ امریکی صدر ڈونلڈ ٹرمپ اور اسرائیلی وزیراعظم بنجمن نیتن یاہو نے اسلامی جمہوریہ ایران کی ‘ریڈ لائنز’ (سرخ لکیروں) کو عبور کیا ہے، اور ان دونوں رہنماؤں کو اپنے ان اقدامات کے سنگین نتائج کا سامنا کرنا پڑے گا۔

مشیرِ سپریم لیڈر کا مزید کہنا تھا کہ دشمن کی جانب سے اتنی مجرمانہ کارروائیوں کے بعد اب امریکہ کے ساتھ کسی بھی قسم کی دوستی یا مفاہمت کی بات کرنا بالکل بے معنی ہو چکا ہے۔ انہوں نے ایرانی قوم پر زور دیا کہ وہ اپنے حقوق اور قومی وقار کا بھرپور دفاع کرے۔ محسن رضائی نے آبنائے ہرمز کی اہمیت پر روشنی ڈالتے ہوئے اسے ایک طاقتور “اسٹریٹجک ہتھیار” قرار دیا جو دشمن کو جارحیت سے باز رکھنے میں کلیدی کردار ادا کرتا ہے، اور ایران ہر قیمت پر اس اہم بحری راستے کی حفاظت کرے گا۔