یورپ میں گرمی، سپین کے جنگلات میں آگ لگ گئی، 12 افراد ہلاک

جنوبی یورپ میں جاری شدید ترین ہیٹ ویو اور ماحولیاتی تبدیلیوں کے باعث اسپین، فرانس اور پرتگال کے جنگلات میں لگی آگ نے تباہی مچا دی ہے۔ اسپین کے جنوب مشرقی صوبے المیریا کے علاقے لوس گایاردوس میں بھڑکنے والی خوفناک جنگلاتی آگ کے نتیجے میں اب تک 12 افراد ہلاک جبکہ 6 شدید زخمی ہو گئے ہیں۔ اندلس کی علاقائی حکومت کے مطابق، ہلاک ہونے والے بعض افراد کی لاشیں ان کی جھلسی ہوئی گاڑیوں سے برآمد ہوئیں جو فرار ہوتے وقت آگ کی لپیٹ میں آ گئی تھیں۔ عینی شاہدین کا کہنا ہے کہ یہ آگ بجلی کی ہائی ٹینشن لائن گرنے کی وجہ سے لگی، جس نے دیکھتے ہی دیکھتے پورے جنگل کو اپنی لپیٹ میں لے لیا۔ اندلس کے صدر خوانما مورینو نے اس واقعے کو بڑا قومی سانحہ قرار دیا ہے، جہاں 150 سے زائد فائر فائٹرز اور اسپین کی ملٹری ایمرجنسی یونٹ (UME) امدادی کارروائیوں میں مصروف ہیں۔ آگ کے باعث ہائی ویز بند کر دی گئی ہیں اور 1,000 سے زائد افراد کو محفوظ مقامات پر منتقل کیا گیا ہے، جبکہ ماہرین کا کہنا ہے کہ یورپ میں عالمی اوسط کے مقابلے میں دو گنا تیزی سے بڑھتا ہوا درجہ حرارت ایسے ہولناک واقعات کی بڑی وجہ ہے۔