ٹرمپ اور نیتن یاہو میں ٹیلیفونک رابطہ، خلیجی خطے کی تازہ صورتحال پر گفتگو

اسرائیلی وزیر اعظم بنیامین نیتن یاہو اور امریکی صدر ڈونلڈ ٹرمپ کے درمیان ایک اہم ٹیلیفونک رابطہ ہوا ہے، جس میں خلیجی خطے کی حالیہ بدلتی ہوئی صورتحال اور جیو پولیٹیکل امور پر تفصیلی تبادلہ خیال کیا گیا۔ اسرائیلی وزیر اعظم کے دفتر کی جانب سے جاری کردہ باضابطہ اعلامیے کے مطابق، دونوں عالمی رہنماؤں نے مختلف تزویراتی شعبوں میں دونوں ممالک کے مابین قریبی رابطے اور باہمی تعاون کے تسلسل کو مضبوطی سے جاری رکھنے پر مکمل اتفاق کیا ہے۔ سوشل میڈیا پلیٹ فارم ‘ایکس’ (سابقہ ٹوئٹر) پر جاری کردہ ایک بیان میں بتایا گیا کہ گفتگو کے دوران صدر ڈونلڈ ٹرمپ نے وزیرِ اعظم نیتن یاہو کو خلیج کے حوالے سے واشنگٹن کی حالیہ سفارتی کوششوں اور دیگر اہم پیش رفتوں سے تفصیلی طور پر آگاہ کیا۔

دوسری جانب، اسرائیلی وزیرِ اعظم بنیامین نیتن یاہو نے اس اعلیٰ سطح کے رابطے کے دوران ترکیہ کے صدر رجب طیب اردوان اور ان کے سیاسی رفقاء کی جانب سے اسرائیل کے وجود کے خلاف دیے گئے حالیہ تند و تیز بیانات پر گہری تشویش کا اظہار کیا۔ انہوں نے امریکی صدر پر واضح کیا کہ ان حالات میں اسرائیل کی سرحدوں کے ساتھ سکیورٹی زون کو برقرار رکھنا ملکی دفاع کے لیے انتہائی ضروری ہے۔ نیتن یاہو کا کہنا تھا کہ اسرائیل خطے کی سیکیورٹی صورتحال کے پیشِ نظر اپنی سرحدوں کے تحفظ کے لیے تمام ضروری اقدامات جاری رکھے گا اور اس سلسلے میں امریکی تعاون کو کلیدی اہمیت حاصل ہے