امریکا کا بھارتی جرائم پیشہ نیٹ ورکس کیخلاف بڑا کریک ڈاؤن، 37 افراد پر فردجرم، 24 گرفتار

امریکی محکمہ انصاف نے بھارت سے منسلک منظم جرائم پیشہ نیٹ ورکس کے خلاف اب تک کی سب سے بڑی اور تاریخ ساز کارروائی کرتے ہوئے “آپریشن ہارڈ بال” (Operation Hardball) کا باضابطہ آغاز کر دیا ہے۔

غیر ملکی خبر رساں ایجنسی کے مطابق، امریکی محکمہ انصاف نے سنسنی خیز انکشافات کرتے ہوئے بتایا ہے کہ بھارت سے تعلق رکھنے والے تین بڑے منظم جرائم پیشہ گروہوں کے 37 کارندوں پر بھتہ خوری، منشیات کی اسمگلنگ، قتل اور دیگر سنگین جرائم کے مقدمات قائم کر دیے گئے ہیں۔ اس وسیع کریک ڈاؤن کے نتیجے میں اب تک 24 ملزمان کو گرفتار کیا جا چکا ہے جبکہ 10 دیگر مفرور ہیں۔ امریکی حکام نے کارروائی کے دوران تقریباً ایک ہزار کلوگرام کوکین، ہیروئن، بھاری مقدار میں نقد رقم اور جدید آتشیں اسلحہ بھی برآمد کیا ہے۔

امریکی محکمہ انصاف کا کہنا ہے کہ یہ بھارتی گینگز امریکا، کینیڈا اور یورپ میں ٹارگٹ کلنگ، بھتہ خوری اور منشیات کی اسمگلنگ جیسے منظم جرائم میں ملوث رہے ہیں جو ان ممالک کی سلامتی کے لیے براہِ راست خطرہ بن چکے ہیں۔ حکام کے مطابق، کینیڈا میں سکھ رہنما ہردیپ سنگھ نِجّر قتل کیس کی تحقیقات کے دوران بدنامِ زمانہ لارنس بشنوئی اور گولڈی برار گینگ کے مبینہ کردار سے متعلق ٹھوس شواہد سامنے آئے، جس کے بعد ان پر فردِ جرم عائد کی گئی۔ امریکی تحقیقاتی ادارے ایف بی آئی (FBI) نے گولڈی برار کی گرفتاری میں مدد دینے والے کے لیے 50 ہزار ڈالر انعام کا بھی اعلان کیا ہے۔

امریکی استغاثہ اور محکمہ انصاف نے بھارتی نظام پر کڑی تنقید کرتے ہوئے کہا کہ بھارت کا کرپٹ نظام ان گینگسٹرز کا اصل سہولت کار ہے، جہاں پولیس اور دیگر افسران خود بھتہ خوری میں ملوث ہیں۔ کینیڈا کی حکومت پہلے ہی بھارتی نژاد بشنوئی گینگ کو باقاعدہ دہشت گرد تنظیم قرار دے چکی ہے۔ امریکی استغاثہ کے مطابق، حیرت انگیز طور پر لارنس بشنوئی اور جگو گینگ کے اہم ارکان بھارتی جیلوں میں قید ہونے کے باوجود وہاں اسمگل شدہ موبائل فونز کے ذریعے امریکا اور یورپ سمیت بیرونِ ملک مجرمانہ سرگرمیوں اور ٹارگٹ کلنگ کی لائیو ہدایات دیتے رہے۔ امریکی حکام نے دوٹوک انداز میں کہا کہ غیر ملکی سرزمین پر ٹارگٹ کلنگ اور پراکسی عناصر کا استعمال بین الاقوامی قانون کی کھلی خلاف ورزی ہے۔

دوسری جانب، بین الاقوامی سیاسی مبصرین کا کہنا ہے کہ مغربی ممالک میں سکھ کمیونٹی کو دھمکانے، انہیں نشانہ بنانے اور ماورائے عدالت قتل کی سازشوں کے ان سنگین الزامات اور امریکی کارروائی نے عالمی سطح پر بھارت کی سیکیورٹی ساکھ کا جنازہ نکال دیا ہے۔