نیویارک کے مشہور ساحلی علاقے کونی آئی لینڈ میں فائرنگ، 4 بچوں سمیت 8 افراد زخمی

امریکہ میں فائرنگ کا ایک اور ہولناک واقعہ سامنے آیا ہے، جہاں نیویارک میں بروکلین کے مشہور ساحلی تفریحی مقام ‘کونی آئی لینڈ’ (Coney Island) میں نامعلوم افراد کی اندھا دھند فائرنگ کے نتیجے میں 4 بچوں سمیت 8 افراد شدید زخمی ہو گئے ہیں۔

نیویارک پولیس کے مطابق، واقعے کے فوراً بعد ریسکیو اہلکاروں نے کارروائی کرتے ہوئے تمام زخمیوں کو قریبی اسپتال منتقل کر دیا ہے۔ اسپتال ذرائع کا کہنا ہے کہ زخمیوں میں شامل ایک 21 سالہ خاتون کی حالت انتہائی تشویشناک ہے، جہاں ڈاکٹرز ان کی جان بچانے کی کوشش کر رہے ہیں۔ پولیس نے  ملزمان کی فوری گرفتاری کے لیے علاقے کو گھیرے میں لے لیا گیا ہے۔ پولیس نے شواہد اکٹھے کر کے بڑے پیمانے پر سرچ آپریشن کا آغاز کر دیا ہے۔

کونی آئی لینڈ نیویارک کا ایک مصروف ترین ساحلی اور تفریحی مقام ہے، جہاں ویک اینڈ اور گرمیوں کے موسم میں مقامی افراد اور سیاحوں کی بڑی تعداد موجود ہوتی ہے۔ اس اچانک فائرنگ کے واقعے سے علاقے میں شدید خوف و ہراس پھیل گیا۔ پولیس کی جانب سے شہریوں سے بھی اپیل کی گئی ہے کہ وہ کسی بھی مشکوک سرگرمی کی اطلاع فوری طور پر حکام کو دیں۔