وٹامن ڈی نہیں لیا تو اس خطرے سے باخبر رہیں، نئی تحقیق

آسٹریلیا میں ہونے والی ایک جدید طبی تحقیق میں انکشاف کیا گیا ہے کہ جسم میں وٹامن ڈی کی کمی نہ صرف ہڈیوں کو کمزور بناتی ہے بلکہ دل کی شریانوں کے امراض اور ہائی بلڈ پریشر کے خطرے میں بھی نمایاں اضافہ کر سکتی ہے۔

تحقیق کے مطابق وٹامن ڈی کی کمی اور دل کی بیماریوں کے درمیان انتہائی مضبوط تعلق پایا گیا ہے۔ محققین نے جینیاتی شواہد کی مدد سے معلوم کیا ہے کہ جن افراد میں وٹامن ڈی کی سطح کم ہوتی ہے، ان میں مناسب مقدار رکھنے والے افراد کے مقابلے میں امراضِ قلب (Cardiovascular Diseases) کا خطرہ دو گنا سے بھی زیادہ ہو سکتا ہے۔ ماہرین کا کہنا ہے کہ دنیا بھر میں دل کی شریانوں سے متعلق بیماریاں اموات کی سب سے بڑی وجوہات میں شامل ہیں، اس لیے اس اہم وٹامن کی کمی پر قابو پا کر ان بیماریوں کے عالمی بوجھ میں نمایاں حد تک کمی لائی جا سکتی ہے۔

تحقیق میں مزید بتایا گیا ہے کہ اگرچہ اس وٹامن کی شدید کمی نسبتاً کم افراد میں دیکھی جاتی ہے، تاہم اس کی معتدل کمی بہت عام ہے جس پر بروقت توجہ دینا انتہائی ضروری ہے۔ خصوصاً ایسے افراد جو زیادہ تر وقت گھروں یا دفاتر کے اندر گزارتے ہیں اور سورج کی روشنی میں کم نکلتے ہیں، وہ اس کا زیادہ شکار ہوتے ہیں۔

محققین کے مطابق وٹامن ڈی کو مچھلی، انڈوں اور فورٹیفائیڈ (وٹامن سے بھرپور) غذاؤں اور مشروبات کے ذریعے بھی حاصل کیا جا سکتا ہے، لیکن صرف غذا کے ذریعے اس کی مطلوبہ مقدار پوری کرنا اکثر ممکن نہیں ہوتا۔ ماہرین نے زور دیا ہے کہ سورج کی روشنی وٹامن ڈی حاصل کرنے کا سب سے آسان، مؤثر اور مفت ذریعہ ہے۔ ان کے مطابق اگر کسی وجہ سے دھوپ میں مناسب وقت گزارنا ممکن نہ ہو، تو ڈاکٹر کے مشورے سے روزانہ وٹامن ڈی سپلیمنٹس کا استعمال لازمی کیا جائے تاکہ ہڈیوں کے ساتھ ساتھ دل کی صحت کو بھی توانا رکھا جا سکے۔