پیدائشی شہریت کا کیس ہارنے کے بعد ٹرمپ انتظامیہ کا پلان بی سامنے آگیا

امریکی خبر رساں ادارے ‘ایگزیوس’ کی رپورٹ کے مطابق، ٹرمپ انتظامیہ کی جانب سے ایک ‘پلان بی’ کے تحت ایسی حاملہ خواتین کے امریکا میں داخلے پر پابندی عائد کرنے کی تجویز زیرِ غور ہے جن کے بارے میں یہ شبہ ہو کہ وہ صرف بچے کی پیدائش کے ذریعے امریکی شہریت حاصل کرنے (برتھ ٹورازم) کے مقصد سے ملک آ رہی ہیں۔

رپورٹ میں واضح کیا گیا ہے کہ ٹرمپ انتظامیہ نے تاحال حاملہ خواتین کے امریکا میں داخلے پر باقاعدہ پابندی عائد نہیں کی ہے، اور حکام کا موقف ہے کہ امریکا کو انتہائی احتیاط سے یہ فیصلہ کرنا ہوگا کہ کون ملک میں داخل ہو سکتا ہے اور کون نہیں۔

ایگزیوس کے مطابق، صدر ڈونلڈ ٹرمپ اس معاملے پر پہلے ہی کانگریس کو نئی قانون سازی کی ہدایت جاری کر چکے ہیں، جبکہ امریکی محکمہ انصاف بھی “برتھ ٹورازم” اسکیموں کے خلاف اپنی تحقیقات کو مزید تیز کرے گا۔ رپورٹ کے مطابق، اعداد و شمار سے معلوم ہوتا ہے کہ ہر سال تقریباً 20 ہزار سے 26 ہزار بچے ان برتھ ٹورازم اسکیموں کے تحت امریکا میں پیدا ہوتے ہیں اور پیدائشی طور پر امریکی شہریت حاصل کرتے ہیں۔