ایران سے معاملات درست سمت میں جا رہے ہیں، اچھی ملاقاتیں ہوئیں، ٹرمپ

امریکی صدر ڈونلڈ ٹرمپ نے ایران کے ساتھ جاری حالیہ پیش رفت پر مثبت ردعمل کا اظہار کرتے ہوئے کہا ہے کہ ایران سے معاملات بالکل درست سمت میں جا رہے ہیں۔ ان کا کہنا ہے کہ ایران کے ساتھ ان کی اچھی ملاقاتیں ہوئی ہیں اور دونوں ممالک کے درمیان معاملات مثبت انداز میں آگے بڑھ رہے ہیں۔

امریکی صدر نے وائٹ ہاؤس میں صحافیوں سے گفتگو کرتے ہوئے کہا کہ “ایران کے ساتھ معاملات بہت اچھے چل رہے ہیں، ایران والوں کے ساتھ اچھی ملاقاتیں ہوئیں، اب دیکھتے ہیں آگے کیا ہوتا ہے۔” ڈونلڈ ٹرمپ نے یاد دہانی کرائی کہ گزشتہ ہفتے ایران پر بہت بڑا حملہ کیا گیا تھا اور ان کا مؤقف اب بھی بدستور یہی ہے کہ ایران کو کسی بھی صورت جوہری ہتھیار رکھنے کی اجازت نہیں دی جا سکتی۔

انہوں نے مزید کہا کہ ایران کی جوہری صلاحیت کو ختم کرنے اور اسے محدود کرنے کے حوالے سے اب تک کی پیش رفت اطمینان بخش ہے اور اس حساس معاملے پر کام درست سمت میں جاری ہے۔

امریکی معاشی صورتحال اور عالمی منڈی پر بات کرتے ہوئے صدر ٹرمپ نے کہا کہ اسٹاک مارکیٹس میں مسلسل زبردست بہتری آ رہی ہے، جس کے باعث سرمایہ کاروں اور کاروباری حلقوں کو بھاری منافع حاصل ہو رہا ہے۔ ان کا کہنا تھا کہ ایران کے ساتھ معاملات خوش اسلوبی سے آگے بڑھنے کے ساتھ ساتھ عالمی سطح پر تیل کی قیمتوں میں کمی کا سلسلہ بھی جاری ہے، اور اسٹاک مارکیٹ اوپر جانے سے ہر عام و خاص کو فائدہ پہنچ رہا ہے۔