دھوپ یا کھلی فضا میں وقت گزارنا خطرناک بیماری کے امکانات کم کر سکتا ہے

ایک نئی سائنسی تحقیق کے مطابق روزانہ مناسب وقت دھوپ یا کھلی فضا میں گزارنا بعد کی زندگی میں ڈیمینشیا (دماغی کمزوری) کے خطرے کو 16 فیصد تک کم کرنے میں مددگار ثابت ہو سکتا ہے۔ چین کے محققین کی جانب سے کی گئی اس تحقیق، جو جرنل سائیکیٹری میں شائع ہوئی، کے مطابق جو افراد اوسطاً روزانہ 42 منٹ سے کم وقت گھر سے باہر گزارتے ہیں، ان میں ڈیمنشیا لاحق ہونے کا خطرہ نسبتاً زیادہ ہوتا ہے۔ ماہرین کا کہنا ہے کہ یہ فوائد صرف دھوپ تک محدود نہیں بلکہ ابر آلود موسم میں بھی باہر وقت گزارنے سے حاصل ہوتے ہیں۔ اگرچہ یہ تحقیق براہِ راست وجہ ثابت نہیں کرتی، تاہم ماہرین کا ماننا ہے کہ سورج کی روشنی جسم کے سرکیڈین ردھم (حیاتیاتی گھڑی) کو منظم رکھتی ہے، جس سے نیند اور دماغی صحت بہتر ہوتی ہے۔