چین: 3 ہزار فٹ بلند ہاتھوں سے تراشی گئی حیرت انگیز پہاڑی

چین کے جنوب مغربی صوبے چونگ چنگ میں واقع ‘لانائنگ کلف روڈ’ اپنی منفرد تعمیر، انتہائی دشوار گزار راستے اور سحر انگیز مناظر کی بدولت دنیا کی خطرناک ترین اور حیرت انگیز پہاڑی سڑکوں میں شمار کی جاتی ہے۔

سطح سمندر سے تقریباً 3 ہزار فٹ کی بلندی پر واقع یہ سڑک ایک عمودی پہاڑ کے سینے کو ہاتھوں سے تراش کر بنائی گئی ہے، جو مقامی آبادی کے بے مثال عزم، محنت اور ہمت کا منہ بولتا ثبوت ہے۔

اس سڑک کی تعمیر کے پیچھے ایک دلفریب کہانی چھپی ہے۔ سال 2001ء میں لانائنگ گاؤں کے محض 23 گھرانوں پر مشتمل ایک چھوٹی سی آبادی، جو کٹی پھٹی پہاڑیوں کے باعث بیرونی دنیا سے بالکل کٹی ہوئی تھی، نے اپنی مدد آپ کے تحت پہاڑ کے خطرناک کنارے کو کاٹ کر گاڑیوں کے گزرنے کے قابل سڑک بنانے کا ایک تاریخی اور بڑا فیصلہ کیا۔

اس کٹھن مقصد کو پورا کرنے کے لیے 1.2 کلومیٹر طویل سڑک کے مختلف حصے گاؤں کے ہر گھرانے کے سپرد کیے گئے۔ انتہائی دشوار گزار اور سیدھے راستے کے باعث وہاں تک کسی قسم کی تعمیراتی مشینری کا پہنچنا ناممکن تھا، اور نہ ہی محض 80 افراد پر مشتمل اس چھوٹے سے گاؤں کے مکینوں کے پاس اتنی جدید مشینری خریدنے کے مالی وسائل موجود تھے۔ اس سڑک کا بیشتر کام لوہے کی روایتی چھینی اور ہتھوڑے کی مدد سے اپنے ہاتھوں سے انجام دیا۔ آج یہ سڑک نہ صرف ان کے لیے بیرونی دنیا کا راستہ ہے، بلکہ دنیا بھر کے سیاحوں کے لیے ایک حیرت انگیز شاہکار بن چکی ہے۔