ایرانی وزیر خارجہ کا سیکرٹری امریکی ہوم لینڈ سکیورٹی کے بیان پر سخت ردعمل

ایران کے وزیر خارجہ عباس عراقچی نے امریکی ہوم لینڈ سکیورٹی کے سیکرٹری مارک وین ملن کے اس بیان پر سخت ترین ردعمل کا اظہار کیا ہے، جس میں انہوں نے ایران کے فیفا ورلڈ کپ سے باہر ہونے پر خوشی منانے اور رقص کرنے کا ذکر کیا تھا۔

سوشل میڈیا پلیٹ فارم پر جاری اپنے ایک بیان میں ایرانی وزیر خارجہ عباس عراقچی نے امریکی سیکرٹری کو مخاطب کرتے ہوئے لکھا: “مشن مکمل ہو گیا، مسٹر ملن! آپ نے ایک اور کام بھی کر دکھایا، اور دنیا پر یہ ثابت کر دیا کہ آپ کسی بھی بین الاقوامی ٹورنامنٹ کی میزبانی کرنے کے بالکل اہل نہیں ہیں۔”

عباس عراقچی نے مزید کہا کہ مارک وین ملن کا یہ غیر ذمہ دارانہ رویہ اس بات کی بدترین مثال ہے کہ ایک میزبان ملک اپنی اخلاقی ذمہ داری اور وقار کو کس طرح مٹی میں ملا سکتا ہے۔

واضح رہے کہ امریکی ہوم لینڈ سکیورٹی کے سیکرٹری مارک وین ملن نے صحافیوں سے گفتگو کرتے ہوئے کھلے عام کہا تھا کہ وہ فٹ بال ورلڈ کپ سے ایران کے باہر ہونے پر انتہائی خوش ہیں۔ ان کا کہنا تھا کہ “مجھے خوشی ہے کہ وہ اب ٹورنامنٹ سے باہر ہو گئے ہیں اور واپس نہیں آئیں گے، شاید میں نے اس خوشی میں ایک آدھ گانا بھی گایا ہو یا خوشی سے رقص بھی کیا ہو۔” امریکی عہدیدار کے اس متعصبانہ بیان پر اب تہران کی جانب سے شدید سفارتی احتجاج سامنے آ رہا ہے۔