منجمد اثاثوں کی بحالی ایران امریکہ مذاکرات میں اہم اور فیصلہ کن نکتہ قرار

ایران اور امریکہ کے درمیان جاری بالواسطہ مذاکرات میں مفاہمتی یادداشت کے تحت منجمد ایرانی اثاثوں کی بحالی کو انتہائی اہم اور فیصلہ کن نکتہ قرار دیا جا رہا ہے۔

تہران سے عرب میڈیا کی رپورٹ کے مطابق، ایران کے لیے اپنے منجمد اثاثوں کا اجرا معاشی اور سیاسی طور پر انتہائی اہمیت کا حامل ہے اور یہی وہ بنیادی شرط ہے جس پر دونوں ممالک کے درمیان آگے کی بات چیت اور سفارتی پیشرفت کا انحصار ہے۔

ایرانی حکام کا اس حوالے سے کہنا ہے کہ مذاکرات میں کسی بھی قسم کی ٹھوس پیشرفت کے لیے منجمد رقوم کی بحالی بنیادی شرط کی حیثیت رکھتی ہے، اور اس بات کا باقاعدہ ذکر دونوں فریقین کے درمیان ہونے والے معاہدے کے آرٹیکل 11 میں بھی موجود ہے۔

اس سلسلے میں ایرانی صدر نے گزشتہ روز اپنے ایک بیان میں تصدیق کی ہے کہ امریکہ نے قطر میں موجود کل 12 ارب ڈالر کے ایرانی اثاثوں میں سے 6 ارب ڈالر کی بحالی پر رضا مندی ظاہر کر دی ہے۔

رپورٹ میں مزید واضح کیا گیا ہے کہ ایران اور امریکہ کے مابین طویل عرصے سے جاری ان مذاکرات میں مالیاتی اثاثوں کی بحالی ایک مرکزی تنازع بنی ہوئی تھی، تاہم اب اس تعطل کا خاتمہ مستقبل میں بڑی پیشرفت کی کلید ثابت ہو سکتا ہے۔