امریکا کا لیبیا میں اتحاد کی بحالی کی کوشش کی حمایت کا اعلان

امریکا نے لیبیا میں پائیدار امن اور اتحاد کی بحالی کی کوششوں کے لیے اپنی بھرپور حمایت کا اعلان کیا ہے۔

عالمی میڈیا رپورٹس کے مطابق یہ بات امریکی وزیر خارجہ مارکو روبیو نے واشنگٹن میں لیبیائی نیشنل آرمی کے نائب کمانڈر صدام حفتر سے ہونے والی ایک اہم ملاقات کے بعد سوشل میڈیا پلیٹ فارم ‘ایکس’ (سابقہ ٹوئٹر) پر اپنے ایک بیان میں کہی۔

امریکی وزیر خارجہ نے بتایا کہ صدام حفتر کے ساتھ ملاقات کے دوران لیبیا کی فوج کو متحد کرنے اور ملک میں پائیدار امن کی راہ ہموار کرنے کے لیے سازگار حالات پیدا کرنے پر تفصیلی تبادلہ خیال کیا گیا۔ انہوں نے واشنگٹن کے اس عزم کو دہرایا کہ امریکی انتظامیہ لیبیا میں استحکام اور اتحاد کی بحالی کے لیے اپنے بین الاقوامی شراکت داروں کے ساتھ مل کر کام جاری رکھے گی۔

مارکو روبیو کا مزید کہنا تھا کہ امریکا ایک زیادہ پرامن، متحد اور خوشحال لیبیا کے قیام کے لیے لیبیائی رہنماؤں اور عالمی شراکت داروں کے ساتھ تعاون کا سلسلہ جاری رکھے گا تاکہ خطے میں طویل مدتی استحکام کو یقینی بنایا جا سکے۔