امریکہ میں پالتو کتے کے حملے میں 7 دن کا بچہ جاں بحق، غفلت برتنے پر والدین اور دادا دادی سمیت خاندان کے 6 افراد گرفتار

امریکی ریاست انڈیانا میں ایک انتہائی دلخراش اور ہولناک واقعہ سامنے آیا ہے جہاں گھر کے پالتو کتے نے محض 7 روز کے معصوم نومولود بچے کو نوچ کر موت کے منہ میں دھکیل دیا۔ اس افسوسناک سانحے کے بعد پولیس نے سخت کارروائی کرتے ہوئے مقتول بچے کے والدین، دادا دادی اور چچا سمیت خاندان کے 6 افراد کو غفلت اور مجرمانہ لاپرواہی کے الزامات میں گرفتار کر لیا ہے۔

غیر ملکی میڈیا کے مطابق یہ اندوہناک واقعہ اس وقت پیش آیا جب ننھا جیسن اے ویور گھر میں موجود تھا اور خاندان کا پالتو کتا، جس کا نام ’چومپ‘ بتایا گیا ہے، اس پر اچانک جھپٹ پڑا۔ پوسٹ مارٹم رپورٹ کے مطابق کتے کے اس وحشیانہ حملے کے نتیجے میں معصوم بچے کے جسم پر 180 سے زائد زخم اور خراشیں آئیں، جبکہ اس کی پسلیاں ٹوٹ گئیں، پھیپھڑے شدید متاثر ہوئے اور دماغی شریانوں سے خون بہنے کے باعث وہ جانبر نہ ہو سکا۔ تحقیقات کے دوران سنسنی خیز انکشافات سامنے آئے ہیں۔ واقعے کے وقت بچے کا والد آسٹن کنزی ویڈیو گیم کھیلنے میں مصروف تھا اور کچھ دیر کے لیے دوسرے کمرے میں گیا تھا۔ اسی دوران کتے نے بچے پر حملہ کر دیا۔ کچن میں موجود دادا تیموتھی کنزی بچے کی آواز سن کر جب کمرے میں پہنچے تو کتا بچے کو گھسیٹ رہا تھا، جس کے بعد وہ بچے کو اٹھا کر ایمبولینس کے لیے باہر کی طرف بھاگے۔

عدالتی دستاویزات کے مطابق اہل خانہ کا کہنا تھا کہ کتا بچے کے جھولے کو ہلاتا تھا اور اس سے “محبت” کرتا تھا، تاہم انہوں نے یہ اعتراف بھی کیا کہ وہ کتا ماضی میں دیگر جانوروں کے ساتھ جارحانہ تھا اور کئی انسانوں کو بھی کاٹ چکا تھا۔ مزید برآں، پولیس نے جب گھر کا معائنہ کیا تو وہاں انتہائی غلاظت پائی گئی؛ پورا گھر کچرے، کاکروچوں اور حشرات سے بھرا ہوا تھا اور بچے کی کار سیٹ پر بھی کیڑے رینگ رہے تھے۔ پولیس نے کارروائی کرتے ہوئے خاندان کے 6 افراد کو گرفتار کر کے ہنٹنگٹن کاؤنٹی جیل منتقل کر دیا ہے جہاں ان کے خلاف مقدمے کی کارروائی جاری ہے۔ حملے کے ذمہ دار کتے کو بعد میں تلف (Euthanize) کر دیا گیا ہے