ٹرمپ کا آج قطر میں مذاکرات کا اعلان، ایران نے تردید کر دی

ایران نے قطر میں امریکی ٹیم کے ساتھ کسی بھی قسم کی ملاقات کی سختی سے تردید کرتے ہوئے واضح کیا ہے کہ دوحا میں امریکہ کے ساتھ آئندہ کوئی ملاقات طے نہیں ہے۔

ایرانی وزارتِ خارجہ کے ترجمان اسماعیل بقائی نے اپنے ایک بیان میں کہا ہے کہ آنے والے دنوں میں امریکہ کے ساتھ کوئی ملاقات شیڈول کا حصہ نہیں ہے۔ وزارتِ خارجہ نے مزید وضاحت کرتے ہوئے کہا کہ امریکی نمائندوں کے دورۂ قطر کا ایرانی وفد کے دورے سے کوئی تعلق نہیں ہے۔ دوسری جانب، امریکی صدر ڈونلڈ ٹرمپ نے دعویٰ کیا ہے کہ دوحا میں آج ایران کی اپنی درخواست پر مذاکرات ہوں گے۔ وائٹ ہاؤس کی ترجمان کیرولین لیویٹ نے تصدیق کی ہے کہ امریکی ایلچی اسٹیو وٹکوف اور جیرڈ کشنر آج دوحہ کے لیے روانہ ہوں گے۔

کیرولین لیویٹ کا کہنا تھا کہ امریکہ جنگ بندی سے متعلق اپنی ذمہ داریاں پوری کر رہا ہے اور صدر ڈونلڈ ٹرمپ ایران کے ساتھ سفارتی حل کے خواہاں ہیں، تاہم ضرورت پڑنے پر امریکی فوجی طاقت کے استعمال سے بھی گریز نہیں کیا جائے گا۔ انہوں نے مزید کہا کہ ایران کے لیے امریکہ کے ساتھ ایک بہتر معاہدہ کرنا ہی بہترین راستہ ہے اور تجارتی جہازوں پر حملوں کا جواب صدر ٹرمپ کی ہدایت پر ہی دیا گیا ہے۔امریکی صدر ٹرمپ نے یہ عزم بھی دہرایا کہ ہماری سفارتی اور فوجی حکمت عملی کے نتیجے میں ایران کے پاس کبھی بھی جوہری ہتھیار نہیں ہوں گے۔