ایرانی فٹبال ٹیم نے ورلڈ کپ میں غیر انسانی دباؤ کا سامنا کیا، اسماعیل بقائی

ایرانی وزارتِ خارجہ کے ترجمان اسماعیل بقائی نے کہا ہے کہ ایران کی قومی فٹبال ٹیم نے فیفا ورلڈ کپ کے دوران شدید اور غیر انسانی دباؤ کا سامنا کیا ہے۔

وزارتِ خارجہ کی جانب سے جاری کردہ ایک سرکاری بیان میں اسماعیل بقائی نے ایرانی ٹیم کی ہمت کو سراہتے ہوئے کہا کہ ایران کی قومی فٹبال ٹیم نے تمام تر سفارتی اور نفسیاتی دباؤ کے باوجود میدان میں شاندار ثابت قدمی کا مظاہرہ کیا ہے۔ نہ تو بین الاقوامی پابندیاں ہمارے لیے بہانہ بنیں اور نہ ہی یہ دباؤ ہمیں جھکا سکا ہے۔ ایرانی وزارتِ خارجہ کا یہ بیان ایک ایسے وقت میں سامنے آیا ہے جب گزشتہ روز ایرانی فٹبال ٹیم کے کپتان مہدی طارمی نے بھی مینیجمنٹ اور میزبانوں کے رویے پر شدید تحفظات کا اظہار کیا تھا۔ مہدی طارمی کا کہنا تھا کہ فٹبال کی عالمی تنظیم (FIFA) اور میزبان ملک امریکہ نے ٹورنامنٹ کے دوران ایران کے ساتھ انتہائی غیر منصفانہ سلوک روا رکھا۔ ایرانی کپتان نے سفری اور انتظامی مسائل کی تفصیلات بتاتے ہوئے انکشاف کیا کہ ایرانی فٹبال ٹیم کے لاجسٹک عملے (انتظامیہ) اور مقامی میڈیا کو تاحال ویزے جاری نہیں کیے گئے، جس سے ٹیم کو شدید مشکلات کا سامنا ہے۔ ٹیم کو سفری سہولیات فراہم نہیں کی جا رہیں اور ہر میچ کھیلنے کے بعد واپس میکسیکو جانا پڑتا ہے، جو کہ اتنے بڑے پیشہ ورانہ اور بین الاقوامی ٹورنامنٹ کے شایانِ شان نہیں ہے۔ مہدی طارمی نے مایوسی کا اظہار کرتے ہوئے کہا کہ اگر میزبانوں اور فیفا کو ہمیں ٹورنامنٹ سے باہر ہی کرنا ہے تو شوق سے کر دیں، لیکن کھیل کے نام پر یہ ناانصافی کسی صورت قبول نہیں۔