یورپی ممالک میں گرمی کا قہر، تمام ریکارڈ ٹوٹ گئے، نظام زندگی معطل
Web Desk
27 June 2026
یورپی ممالک اس وقت قیامت خیز اور غیر معمولی شدید گرمی کی لہر کی زد میں ہیں، جہاں جرمنی، ڈنمارک، جمہوریہ چیک اور سوئٹزرلینڈ سمیت متعدد ممالک میں درجہ حرارت کے کئی سالہ پرانے ریکارڈ ٹوٹ گئے ہیں۔
غیر ملکی خبر رساں ادارے کی رپورٹ کے مطابق، ہفتے کے روز یورپ کے شمالی اور وسطی علاقوں میں بعض مقامات پر درجہ حرارت 40 ڈگری سینٹی گریڈ سے بھی تجاوز کر گیا۔ جرمنی، ڈنمارک اور جمہوریہ چیک میں تاریخ کے بلند ترین درجہ حرارت کے ابتدائی ریکارڈ رپورٹ ہوئے، جبکہ سوئٹزرلینڈ میں جون کے مہینے کی ریکارڈ توڑ گرمی درج کی گئی۔ جرمنی کے محکمہ موسمیات کے مطابق، مشرقی ریاست ‘سیکسونی انہالٹ’ کے علاقے موکرن ڈریوٹز میں پارہ 41.5 ڈگری سینٹی گریڈ تک جا پہنچا، جو کہ ایک نیا ریکارڈ ہے۔ اسی طرح ڈنمارک میں 1874 کے بعد، یعنی گزشتہ 150 سے زائد سالوں کی موسمیاتی تاریخ میں پہلی بار درجہ حرارت 37 ڈگری سینٹی گریڈ ریکارڈ کیا گیا ہے۔ دوسری جانب، فرانس میں شدید گرمی کی لہر کے باعث درجنوں افراد کے ہلاک ہونے کی افسوسناک اطلاعات موصول ہوئی ہیں۔ غیر معمولی درجہ حرارت نے خطے کے ریلوے نظام، بجلی کی پیداوار اور دیگر عوامی خدمات کو بری طرح متاثر کیا ہے، جس کی وجہ سے کئی علاقوں میں تعلیمی سرگرمیاں معطل اور بیرونی تقریبات ملتوی کر دی گئی ہیں۔
گرمی کی شدت کے پیش نظر اٹلی کی وزارت صحت نے میلان، روم، ٹورین، وینس، فلورنس اور جینوا سمیت 18 اہم شہروں میں ہفتہ اور اتوار کے لیے ‘ریڈ الرٹ’ جاری کر دیا ہے۔ ملک کے سب سے بڑے دریا ‘پو’ (Po) میں پانی کی سطح نمایاں حد تک کم ہو گئی ہے، جس سے مقامی ماحولیاتی نظام اور زرعی شعبے کو شدید خطرات لاحق ہو گئے ہیں۔ موسمیاتی ماہرین کا کہنا ہے کہ یہ ہولناک صورتحال “اومیگا بلاک” (Omega Block) نامی فضائی نظام کے باعث پیدا ہوئی ہے، جس میں گرم ہوا کا ایک بڑا دباؤ طویل عرصے تک ایک ہی خطے پر جم جاتا ہے اور درجہ حرارت کو معمول سے کہیں زیادہ بڑھا دیتا ہے۔ تاہم، موسمیاتی اداروں نے پیش گوئی کی ہے کہ ہفتے کے اختتام اور آئندہ چند روز کے دوران بعض علاقوں میں گرج چمک کے ساتھ بارشیں ہو سکتی ہیں، جس سے گرمی کی شدت میں جزوی کمی کی امید ہے
متعلقہ عنوانات
پاکستان اورعمان کے درمیان پٹرولیم مصنوعات کی خرید و فروخت کا اہم معاہدہ طے پا گیا
22 November 2026
استنبول: ساتویں عالمی ویمن سمٹ، اعظم نذیر تارڑ کی قیادت میں پاکستانی وفد کی شرکت
22 November 2026
ایران اور روس کے درمیان جوہری تعاون جاری رہے گا: روسی عہدیدار
22 November 2026
پرتگال کے وزیر مملکت اور وزیر خارجہ پاؤلو رینجل پاکستان پہنچ گئے
22 November 2026
پاکستان کی بھارت سمیت تمام ایس سی او ممالک کو مکالمے کی دعوت
22 November 2026
پاسدارانِ انقلاب کا ڈرون حملوں میں امریکی پیٹریاٹ نظام کے 2 ریڈار تباہ کرنے کا دعویٰ
22 November 2026
قازقستان میں تیزی سے پھیلنے والی پراسرار بیماری کی اطلاعات، سرکاری تفصیلات طلب
22 November 2026
ابوظہبی میں مشرقِ وسطیٰ کے پہلے ڈزنی تھیم پارک کی نئی تفصیلات سامنے آگئیں
22 November 2026