آبنائے ہرمز سے گزرنے کیلئے پاسدارانِ انقلاب کی بحریہ کے ساتھ کوآرڈینیشن لازمی ہے: ایران

تہران: ایرانی پاسدارانِ انقلاب (IRGC) کی بحریہ نے خلیجی خطے کی تزویراتی (اسٹریٹجک) گزرگاہ ‘آبنائے ہرمز’ (Strait of Hormuz) سے تجارتی جہازوں کے گزرنے کے حوالے سے ایک سخت ترین انتباہی وارننگ جاری کر دی ہے۔ پاسدارانِ انقلاب کا کہنا ہے کہ انہوں نے آبنائے ہرمز سے جہازوں کی بحفاظت آمد و رفت کے لیے ایک نیا مخصوص راستہ مقرر کر دیا ہے اور اس کی خلاف ورزی کرنے والوں کے خلاف سخت فوجی کارروائی کی جائے گی۔

پاسدارانِ انقلاب کی بحریہ کی جانب سے جاری کردہ باقاعدہ بیان میں واضح کیا گیا ہے کہ ایران کی پیشگی اجازت اور رابطے کے بغیر آبنائے ہرمز کے لیے کسی بھی دوسرے ملک کی جانب سے نئے بحری راستے کا اعلان یا اس پر عمل درآمد کرنا سراسر ناقابلِ قبول اور علاقائی سلامتی کے لیے انتہائی خطرناک اقدام ہے۔ ایران کے مطابق، اس اہم ترین سمندری شاہراہ سے محفوظ گزرگاہ صرف اور صرف ان مخصوص روٹس کے ذریعے ہی ممکن ہے جو ایران نے خود باقاعدہ اور قانونی طور پر مقرر کر رکھے ہیں۔

بیان میں تمام بین الاقوامی تجارتی اور مال بردار جہازوں کو خبردار کیا گیا ہے کہ آبنائے ہرمز سے گزرنے کے لیے پاسدارانِ انقلاب کی نیول فورس کے ساتھ مکمل کوآرڈینیشن (رابطہ و تعاون) قائم کرنا لازمی ہے۔ طے شدہ سیکیورٹی ہدایات کی خلاف ورزی کرنے والے یا ایرانی حدود میں بغیر اجازت داخل ہونے والے کسی بھی بحری جہاز کو کارروائی کا سامنا کرنا پڑے گا۔

ایرانی پاسدارانِ انقلاب کا یہ سخت ردِعمل عمان کی جانب سے سامنے آنے والے ایک حالیہ فیصلے کے بعد دیکھا جا رہا ہے

عمان کی حکومت نے اعلان کیا تھا کہ اس نے بین الاقوامی تجارتی جہاز رانی کے عمل کو زیادہ آسان، محفوظ اور تیز رفتار بنانے کے لیے آبنائے ہرمز میں اپنے ساحل کے قریب ایک نیا عارضی سمندری راستہ کھول دیا ہے۔عمانی وزارتِ خارجہ کا مؤقف تھا کہ اس نئی راہداری سے گزرنے والے جہازوں پر کوئی اضافی فیس عائد نہیں ہوگی؛ تاہم جہازوں کو صرف عمانی حکام کے ساتھ سگنل اور رابطے بحال رکھنے ہوں گے۔

اگرچہ ایرانی پاسدارانِ انقلاب نے اپنے تند و تیز بیان میں براہِ راست عمان کا نام لے کر نشانہ نہیں بنایا اور نہ ہی یہ کھل کر واضح کیا ہے کہ آیا ان کا اشارہ عمانی حکومت کے اسی مخصوص بحری راستے کی طرف ہے یا نہیں، لیکن دفاعی ماہرین کے مطابق، یہ وارننگ عمان کے اعلان کے ردِعمل میں ہی جاری کی گئی ہے جو خلیج فارس اور بحیرۂ عرب کے اس انتہائی حساس ترین سمندری خطے میں تجارتی خودمختاری برقرار رکھنے کی ایک نئی لہر کو جنم دے سکتی ہے۔