ایران عام ریاست بننے کا فیصلہ کرے تو ترقی کے بڑے مواقع مل سکتے ہیں: مارکو روبیو

امریکی وزیر خارجہ مارکو روبیو نے ایران کے حوالے سے ایک اہم بیان جاری کرتے ہوئے کہا ہے کہ اگر ایران انقلابی تحریک کے بجائے ایک عام ریاست بننے کا فیصلہ کرے، تو اسے ترقی اور خوشحالی کے بڑے مواقع مل سکتے ہیں۔ انہوں نے واضح کیا کہ اس مثبت پیشرفت کا تمام تر انحصار آنے والے دنوں میں متعدد سکیورٹی مسائل کے حل اور ان پر ہونے والی عملی پیش رفت سے جڑا ہوا ہے۔ امریکی وزیر خارجہ کا کہنا تھا کہ امریکا اور خطے کے ممالک ایران کے ساتھ تعلقات میں بہتری کے خواہاں ہیں، لیکن اس کے لیے تہران کو اپنی پالیسیوں میں واضح تبدیلی لانا ہوگی۔

مارکو روبیو نے خطے میں جاری کشیدگی کی بنیادی وجہ پر بات کرتے ہوئے کہا کہ جب تک ایران کے حمایت یافتہ گروہ عراق سے میزائل اور ڈرون حملے جاری رکھے ہوئے ہیں اور دہشت گردی کی سرگرمیوں میں ملوث ہیں، اس وقت تک خطے میں دشمنی اور تنازع کا مکمل خاتمہ ممکن نہیں ہے۔ انہوں نے مزید کہا کہ یہ تمام سکیورٹی خدشات اور خطے کے امن سے جڑے معاملات انتہائی اہمیت کے حامل ہیں، اور مناسب وقت پر ایران کے ساتھ جاری سفارتی مذاکرات میں ان امور کو تفصیلی طور پر زیرِ بحث لایا جائے گا۔