برطانوی وزیراعظم کیئر اسٹارمر نے عہدے سے مستعفی ہونے کا اعلان کردیا

برطانیہ کے سیاسی بحران میں ایک اور بڑا بریک تھرو سامنے آیا ہے جہاں شدید اندرونی دباؤ کے بعد برطانوی وزیرِ اعظم سر کیئر اسٹارمر نے بالاخر اپنے عہدے سے باقاعدہ مستعفی ہونے کا اعلان کر دیا ہے۔

10 ڈاؤننگ اسٹریٹ پر ایک ہنگامی پریس کانفرنس سے خطاب کرتے ہوئے برطانوی وزیرِ اعظم نے اپنے مستقبل کے لائحہ عمل اور اقتدار کی منتقلی کے حوالے سے اہم ترین تفصیلات سے آگاہ کیا۔کیئر اسٹارمر نے واضح کیا کہ وہ لیبر پارٹی کی نئی قیادت کے انتخاب کا عمل مکمل ہونے تک عارضی طور پر بطور وزیرِ اعظم اپنے فرائض سرانجام دیتے رہیں گے۔ انہوں نے اعلان کیا کہ لیبر پارٹی کی قیادت کے انتخاب کے لیے باقاعدہ نامزدگیاں 9 جولائی سے اوپن ہوں گی، جبکہ وہ پارٹی کی نیشنل ایگزیکٹو کمیٹی (NEC) سے انتخابی شیڈول کو حتمی شکل دینے کی باقاعدہ درخواست کریں گے۔ انہوں نے بتایا کہ استعفے کے فیصلے کے تناظر میں آج صبح ان کی برطانوی بادشاہ کنگ چارلس سے تفصیلی گفتگو بھی ہوئی ہے۔اپنی ہی جماعت کے اندرونی اختلافات کا ذکر کرتے ہوئے ان کا کہنا تھا کہ بار بار یہ تاثر دیا گیا کہ ہماری پارٹی کمزور اور ختم ہو گئی ہے، چنانچہ میں پارٹی کی خواہش کا احترام کرتے ہوئے لیبر پارٹی کی لیڈرشپ سے مستعفی ہو رہا ہوں۔

سر کیئر اسٹارمر نے پریس کانفرنس کے اختتام پر عزم ظاہر کیا کہ وہ اقتدار کی اس منتقلی کو منظم، پرامن اور ہموار بنانے کے لیے ہر ممکن اقدام اٹھائیں گے اور جو بھی ان کا جانشین منتخب ہوگا، اسے اپنی بھرپور حمایت اور مکمل تعاون فراہم کریں گے۔