سوچا تھا ہاتھ ملانے سے معاملات بہتر ہونگے: بیرسٹر گوہر

پاکستان تحریک انصاف (PTI) کے چیئرمین بیرسٹر گوہر علی خان نے ملکی سیاسی صورتحال پر بات کرتے ہوئے کہا ہے کہ اب وقت آ گیا ہے کہ ہم سب کو اپنی ذاتی انا سے بالاتر ہو کر ملک و قوم کے لیے کچھ کرنا ہوگا، کیونکہ سیاست میں مقابلہ کارکردگی کی بنیاد پر ہونا چاہیے، نہ کہ سیاسی رہنماؤں کو جیلوں میں ڈالنے پر۔

پارلیمنٹ ہاؤس کے باہر میڈیا سے خصوصی گفتگو کرتے ہوئے بیرسٹر گوہر نے واضح کیا کہ ہم نے وزیراعظم کی جانب سے مذاکرات کی دعوت کا خیرمقدم کیا ہے، تاہم حکومت کے ساتھ کسی بھی فورم پر باقاعدہ بات چیت کے حوالے سے فی الحال کوئی پیش رفت یا رابطہ نہیں ہو رہا۔ ان کا کہنا تھا کہ مذاکرات ایک انتہائی سنجیدہ عمل ہے اور اس کے آغاز کے لیے فریقین کو باقاعدہ کہیں بیٹھنا ہوگا۔

“ہم نے سوچا تھا کہ ہاتھ ملانے سے شاید معاملات میں بہتری آئے گی، اسی سوچ کے تحت محمود خان اچکزئی نے خود جا کر وزیراعظم سے مصافحہ بھی کیا تھا۔ مذاکرات کا آغاز ہماری خواہش ضرور ہے، لیکن میں یہ واضح کر دینا چاہتا ہوں کہ تاحال کسی بھی سطح کا کوئی باضابطہ رابطہ قائم نہیں ہوا ہے۔”

پی ٹی آئی کے بانی کے حوالے سے بات کرتے ہوئے چیئرمین تحریک انصاف نے کہا کہ جب تک عوام اور جماعت کے لوگ بانی پی ٹی آئی کے ساتھ کھڑے ہیں، انہیں مائنس (سیاست سے باہر) نہیں کیا جا سکتا، اور اس پورے سیاسی بحران کا کوئی نہ کوئی پائیدار حل نکالنا ہوگا۔ انہوں نے سیاسی رہنماؤں کو قید کرنے کی سیاست کی سخت مخالفت کرتے ہوئے حکومت سے درخواست کی کہ کل بانی پی ٹی آئی سے ان کی فیملی کو ملاقات کرنے کی اجازت دی جائے۔