ملک کے مختلف علاقوں میں آج بھی بارش کی پیشگوئی

محکمہ موسمیات نے ملک کے بیشتر حصوں میں آج بھی تیز ہواؤں اور گرج چمک کے ساتھ بارش کی پیشگوئی کی ہے۔

محکمہ موسمیات کے جاری کردہ تازہ ترین الرٹ کے مطابق، صوبہ پنجاب کے متعدد اضلاع بشمول راولپنڈی، مری، گلیات، اٹک، چکوال، جہلم، گجرات، گوجرانوالہ، لاہور، شیخوپورہ، سیالکوٹ، نارووال، ساہیوال، خوشاب، سرگودھا، بھکر اور لیہ میں بادل برسنے کی توقع ہے۔ اس کے علاوہ میانوالی، قصور، اوکاڑہ، جھنگ، فیصل آباد، خانیوال، ملتان اور وہاڑی میں بھی موسم ابر آلود رہنے اور بارش کا امکان ظاہر کیا گیا ہے۔

خیبرپختونخوا کے حوالے سے محکمہ موسمیات کا کہنا ہے کہ صوبے کے بیشتر اضلاع میں موسم مجموعی طور پر گرم اور خشک رہے گا، تاہم دیر، چترال، سوات، کوہستان، شانگلہ، بٹگرام، بونیر، کوہاٹ، ڈیرہ اسماعیل خان، خیبر، وزیرستان، مانسہرہ، ایبٹ آباد، ہری پور، پشاور اور صوابی کے چند مقامات پر گرج چمک کے ساتھ بارش ہو سکتی ہے۔

دوسری جانب، سندھ اور بلوچستان کے بیشتر اضلاع میں موسم شدید گرم اور خشک رہنے کی پیشگوئی کی گئی ہے۔ صوبائی دارالحکومت کراچی میں سمندری ہوائیں معطل رہنے کے باعث حبس کی صورتحال برقرار رہ سکتی ہے اور زیادہ سے زیادہ درجہ حرارت 35 ڈگری سینٹی گریڈ تک جانے کا امکان ہے۔ تاہم، بلوچستان کے چند مشرقی و شمالی اضلاع جیسے بارکھان، سبی، کوہلو اور ژوب میں مقامی طور پر بادل بننے اور ہلکی سے معتدل بارش ہونے کی امید ہے۔