چین کی جانب سے پاکستان اور قطر کی ثالثی کوششوں کی حمایت

امریکہ اور ایران کے مابین سوئٹزرلینڈ میں ہونے والے امن مذاکرات میں اہم پیش رفت کے بعد، عالمی سطح پر اس کا خیرمقدم کیا جا رہا ہے۔ اس تناظر میں، دوست ملک چین نے بھی ان مذاکرات پر اپنے مثبت ردعمل کا اظہار کرتے ہوئے دونوں ممالک پر بات چیت کا عمل جاری رکھنے پر زور دیا ہے۔

بیجنگ میں پریس بریفنگ کے دوران چینی وزارتِ خارجہ کے ترجمان گو جیا کن نے دونوں فریقین پر زور دیا کہ وہ اب تک حاصل ہونے والی تزویراتی پیش رفت اور مثبت رفتار (Momentum) کو برقرار رکھیں اور امن کے اس سفر کو مزید آگے بڑھائیں۔

 چینی ترجمان گو جیا کن نے کہا کہ چین پرامید ہے کہ ایران اور امریکہ سفارت کاری کے ذریعے حتمی اور مثبت نتائج تک پہنچنے کے لیے اپنی مشترکہ کوششیں مستقل مزاجی کے ساتھ جاری رکھیں گے۔چین نے سوئٹزرلینڈ میں ہونے والے ان اہم مذاکرات کو ممکن بنانے اور دونوں طاقتوں کو ایک میز پر لانے کے لیے پاکستان، قطر اور دیگر عالمی فریقین کی مخلصانہ ثالثی اور سفارتی کاوشوں کی کھل کر تعریف اور بھرپور حمایت کا اعلان کیا۔ بیجنگ نے اپنے اصولی مؤقف کو دہراتے ہوئے ایک بار پھر اس بات پر زور دیا کہ عالمی اور علاقائی مسائل کے پائیدار اور پُرامن حل کا بہترین اور واحد راستہ صرف اور صرف ‘مذاکرات اور سفارت کاری’ ہی ہے۔چینی دفترِ خارجہ کے مطابق، مشرقِ وسطیٰ اور عالمی امن کے لیے تمام متعلقہ فریقین کو چاہیے کہ وہ کشیدگی میں کمی لانے اور باہمی اعتماد کو فروغ دینے کے لیے مل جل کر کام کریں۔

چینی ترجمان کے یہ ریمارکس ایک ایسے وقت میں سامنے آئے ہیں جب پاکستان اور قطر کی کامیاب سہولت کاری کے نتیجے میں سوئٹزرلینڈ کے شہر برگن اسٹاک میں ہونے والے اعلیٰ سطحی مذاکرات کے پہلے دور کے اختتام پر امریکہ اور ایران کے درمیان اگلے 60 دنوں میں حتمی معاہدے تک پہنچنے کے لیے ایک مشترکہ روڈ میپ پر اتفاق ہو چکا ہے۔