ایران کا امریکہ سے اسرائیل کو شرائط پر عمل درآمد کا پابند بنانے کا مطالبہ

تہران: ایران کے نائب وزیر خارجہ سعید خطیب زادہ نے واضح کیا ہے کہ اگر امریکہ معاہدے کا احترام کرنے اور اسرائیل کو اس کی شرائط پر عمل درآمد کا پابند بنانے میں سنجیدہ ہے، تو ایران امریکہ کے ساتھ مذاکرات کو آگے بڑھانے کے لیے مکمل تیار ہے۔ الجزیرہ ٹی وی کو انٹرویو دیتے ہوئے انہوں نے جنوبی لبنان پر اسرائیلی حملوں کی تازہ لہر پر سخت ردعمل کا اظہار کیا اور خبردار کیا کہ اسرائیل کی ان مسلسل جنگی کارروائیوں کے سنگین اور فوری نتائج برآمد ہوں گے۔ نائب وزیر خارجہ نے مزید کہا کہ ایران خطے میں کشیدگی کا خاتمہ چاہتا ہے اور غزہ سمیت تمام محاذوں پر پائیدار امن کے قیام کی بھرپور حمایت کرتا ہے۔