نیویارک: 38 ملین ڈالر میڈیکیڈ فراڈ کیس، پاکستانی نژاد کاروباری شخصیت سمیت 8 افراد گرفتار

امریکی ریاست نیویارک کے شہر بروکلین میں وفاقی حکام نے ایک مبینہ بڑے مالیاتی اسکینڈل میں کارروائی کرتے ہوئے متعدد افراد کو گرفتار کرنے کا دعویٰ کیا ہے، جن پر الزام ہے کہ وہ میڈیکیڈ کے تحت 38 ملین ڈالر سے زائد کی جعلی ادائیگیوں اور کِک بیک اسکیم میں ملوث رہے۔

گرفتار ہونے والوں میں پاکستانی نژاد معروف کاروباری شخصیت اور کمیونٹی بورڈ 13 کے رکن پرویز صدیقی سمیت سات دیگر افراد شامل ہیں۔

وفاقی الزامات کے مطابق یہ مبینہ اسکیم دو Adult Day Care مراکز اے پی این اے Adult Day Care اور آشیانہ سوشل Adult Day Care کے ذریعے 2019 سے دسمبر 2025 تک چلائی جاتی رہی۔

تحقیقات میں دعویٰ کیا گیا ہے کہ بزرگ شہریوں کو ایسے مراکز میں رجسٹر کیا جاتا تھا جہاں وہ اکثر حاضر نہیں ہوتے تھے یا بالکل نہیں جاتے تھے، لیکن ان کے نام پر میڈیکیڈ سے باقاعدہ ادائیگیاں وصول کی جاتی رہیں۔

الزامات کے مطابق بعض افراد کو مراکز میں شامل ہونے کے بدلے نقد رقوم دی جاتی تھیں، جبکہ انہیں دیگر افراد کو بھی شامل کرنے پر کِک بیک فراہم کیا جاتا تھا۔

تحقیقات میں یہ بھی سامنے آیا ہے کہ جعلی حاضری شیٹس تیار کی گئیں، ریکارڈ میں رد و بدل کیا گیا اور فنڈز کو مختلف کمپنیوں کے ذریعے منتقل کر کے چھپانے کی کوشش کی گئی۔

ذرائع کے مطابق اس نیٹ ورک میں بعض مارکیٹرز مخصوص کمیونٹیز کے افراد کو ہدف بنا کر انہیں پروگرام میں شامل کرتے اور مالی فوائد حاصل کرتے تھے۔

وفاقی حکام نے اس کیس میں مزید تحقیقات جاری رکھنے کا اعلان کیا ہے، جبکہ ملزمان کے خلاف عدالتی کارروائی ابھی ابتدائی مراحل میں ہے۔