نارفولک ساحل پر کوڑا پھینکنے پر 500 پاؤنڈ تک جرمانے کی تجویز

 برطانیہ کے مشہور نارفولک ساحل پر ماحولیاتی آلودگی اور کوڑا کرکٹ پھیلانے والوں کے خلاف جرمانوں میں خطیر اضافے کی تجاویز سامنے آئی ہیں۔ نارتھ نارفولک ڈسٹرکٹ کونسل نے فکسڈ پینلٹی نوٹس کے تحت کوڑا پھینکنے کا موجودہ زیادہ سے زیادہ جرمانہ 80 پاؤنڈ سے بڑھا کر 500 پاؤنڈ کرنے کی تجویز منظور کر لی ہے۔

برطانوی میڈیا کی رپورٹس کے مطابق، غیر قانونی طور پر بڑی مقدار میں کچرا اور فضلہ پھینکنے (Fly-Tipping) کے خلاف بھی کارروائی مزید سخت کی جا رہی ہے، جس کے تحت جرمانے کی حد 300 پاؤنڈ سے بڑھا کر 1,000 پاؤنڈ کرنے پر غور کیا جا رہا ہے۔ کونسل حکام کا کہنا ہے کہ کرومر، شیرنگھم اور ویسٹ رنٹن پر مشتمل 45 میل طویل ساحلی پٹی پر سیاحوں کی بڑی تعداد آتی ہے، جہاں کوڑے کے باعث مقامی آبادی میں شدید تشویش پائی جاتی تھی۔

نارتھ نارفولک ڈسٹرکٹ کونسل کے ترجمان کا کہنا ہے کہ بھاری جرمانوں کا مقصد ماحول دشمن عناصر کو سخت پیغام دینا اور فضلے کے پھیلاؤ کی روک تھام ہے۔ حکام کے مطابق یہ اقدام کچرے سے ہونے والے ماحولیاتی نقصانات کے بارے میں عوامی آگاہی پیدا کرنے کی وسیع تر مہم کا حصہ ہے۔