فیفا عالمی کپ 2026 کا شاندار آغاز، میکسیکو میں رنگا رنگ افتتاحی تقریب

میکسیکو سٹی: فٹبال کے سب سے بڑے عالمی مقابلے فیفا عالمی کپ 2026 کا باقاعدہ آغاز ہو گیا، جس کے سلسلے میں شریک میزبان ملک میکسیکو میں شاندار اور رنگا رنگ افتتاحی تقریب کا انعقاد کیا گیا۔

افتتاحی میچ سے قبل منعقد ہونے والی تقریب میں دنیا کے معروف فنکاروں نے اپنی پرفارمنس کے ذریعے شائقین کو محظوظ کیا۔ عالمی شہرت یافتہ گلوکارہ شکیرا اور نائجیریا کے معروف گلوکار برنا بوائے نے عالمی کپ کا سرکاری نغمہ پیش کیا، جس پر اسٹیڈیم میں موجود ہزاروں شائقین جھوم اٹھے۔

شکیرا کی آمد سے قبل روایتی میکسیکن ثقافت کو اجاگر کرتے ہوئے رقص اور ثقافتی مظاہروں کے ذریعے عالمی کپ کو خوش آمدید کہا گیا۔ تقریب میں میکسیکو کے معروف موسیقی گروپ مانا، وینزویلا کے گلوکار ڈینی اوشین اور کولمبیا کے جے بالوین نے بھی اپنے فن کا مظاہرہ کیا۔

فیفا عالمی کپ 2026 کے افتتاحی میچ میں میزبان میکسیکو اور جنوبی افریقہ کی ٹیمیں مدِمقابل ہیں۔

واضح رہے کہ عالمی کپ کے دیگر شریک میزبان ممالک کینیڈا اور امریکا میں بھی پہلے میچ سے قبل افتتاحی تقریبات منعقد کی جائیں گی۔