شاہین آفریدی کو ٹیسٹ ٹیم سے مستقل طور پر ڈراپ کرنے کا فیصلہ

پاکستان کرکٹ بورڈ نے قومی ٹیم کے فاسٹ بولر اور ون ڈے کپتان شاہین آفریدی کو ٹیسٹ ٹیم سے مستقل طور پر باہر رکھنے کا فیصلہ کر لیا ہے۔

ذرائع کے مطابق لاہور میں منعقد ہونے والے تربیتی کیمپ کے لیے 46 سے زائد کھلاڑیوں کو مدعو کیا گیا ہے، جن میں ٹیسٹ فارمیٹ کے لیے 22 اور وائٹ بال فارمیٹ کے لیے 27 کھلاڑی شامل کیے گئے ہیں۔

رپورٹس کے مطابق شاہین آفریدی کو ٹیسٹ کیمپ کے لیے منتخب نہیں کیا گیا تاہم وہ ون ڈے اور ٹی ٹوئنٹی کیمپ کا حصہ رہیں گے اور توقع ہے کہ وہ 15 جون کو کیمپ میں رپورٹ کریں گے۔

ذرائع کے مطابق ویسٹ انڈیز کے دورے کی تیاریوں کے لیے ریڈ بال کیمپ دس جولائی تک جاری رہے گا جبکہ وائٹ بال کیمپ 18 ستمبر تک مکمل کیا جائے گا۔

پاکستان کرکٹ بورڈ کے تھنک ٹینک کے مطابق یہ فیصلہ مستقبل کی حکمت عملی اور کھلاڑی کی کارکردگی کو مدنظر رکھتے ہوئے کیا گیا ہے۔