اسلام آباد: سیکٹر آئی 10 میں واقع گھر میں سلنڈر دھماکا، 2 افراد جاں بحق

اسلام آباد: وفاقی دارالحکومت کے سیکٹر آئی 10 میں واقع ایک گھر میں گیس سلنڈر دھماکے کے نتیجے میں 2 افراد جاں بحق اور 3 شدید زخمی ہو گئے۔

ریسکیو حکام کے مطابق یہ افسوسناک واقعہ گھر کی پہلی منزل (فرسٹ فلور) پر پیش آیا، جہاں کچن میں گیس لیکیج کے باعث اچانک سلنڈر زور دار دھماکے سے پھٹ گیا۔ دھماکے کے ساتھ ہی کچن میں خوفناک آگ بھڑک اٹھی، جس نے وہاں موجود افراد کو اپنی لپیٹ میں لے لیا۔حادثے کے نتیجے میں 5 افراد شدید جھلس کر زخمی ہوئے، جنہیں ریسکیو ٹیموں نے فوری کارروائی کرتے ہوئے انتہائی تشویشناک حالت میں ہسپتال منتقل کیا۔ہسپتال ذرائع کے مطابق، ڈاکٹروں کی بھرپور کوششوں کے باوجود زخموں کی تاب نہ لاتے ہوئے 2 افراد دورانِ علاج دم توڑ گئے، جبکہ دیگر 3 زخمیوں کو طبی امداد فراہم کی جا رہی ہے جن میں سے بعض کی حالت اب بھی نازک بتائی جاتی ہے۔واقعے کی اطلاع ملتے ہی فائر بریگیڈ کے عملے نے بھی موقع پر پہنچ کر امدادی کارروائیوں میں حصہ لیا اور گھر میں لگی آگ پر مکمل قابو پا کر اسے مزید پھیلنے سے روکا۔ پولیس اور انتظامیہ نے واقعے کی تحقیقات کا آغاز کر دیا ہے۔