پاکستان سمیت خلیجی ریاستوں، امریکا اور یورپ میں عیدالاضحیٰ جوش و خروش کے ساتھ منائی جارہی ہے

پاکستان سمیت سعودی عرب، متحدہ عرب امارات اور دیگر خلیجی ممالک میں عیدالاضحیٰ آج مذہبی عقیدت، جوش و جذبے کے ساتھ منائی جارہی ہے جبکہ ملک بھر میں نماز عید کے بڑے اجتماعات منعقد کیے جارہے ہیں۔
نماز عید کی ادائیگی کے بعد شہری ایک دوسرے سے گلے مل کر عید کی مبارکباد دے رہے ہیں اور سنت ابراہیمی کی پیروی کرتے ہوئے جانوروں کی قربانی کا سلسلہ بھی جاری ہے۔
کراچی میں نماز عیدالاضحیٰ کے بڑے اجتماعات سبیل والی مسجد، میمن مسجد، فیضان مدینہ، مرکزی عید گاہ ناظم آباد، جامع مسجد فاروق اعظم، جامع مسجد نیو ٹاؤن، مسجد کنز الایمان، دارالعلوم نعیمیہ اور دارالعلوم امجدیہ سمیت مختلف مساجد، امام بارگاہوں، عید گاہوں اور کھلے میدانوں میں منعقد ہورہے ہیں۔
شہر قائد میں نماز عید کا سب سے بڑا اجتماع باغ جناح پولو گراؤنڈ میں منعقد ہورہا ہے جہاں شہریوں کے ساتھ سیاسی، سماجی اور کاروباری شخصیات سمیت غیر ملکی سفارتکار بھی نماز عید ادا کریں گے۔
انتظامیہ کی جانب سے امن و امان برقرار رکھنے کے لیے سیکیورٹی کے سخت انتظامات کیے گئے ہیں جبکہ مختلف علاقوں میں پولیس اور قانون نافذ کرنے والے اداروں کی اضافی نفری تعینات کی گئی ہے۔
دوسری جانب مسجد الحرام مکہ مکرمہ اور مسجد نبوی مدینہ منورہ میں بھی نماز عید کے روح پرور اجتماعات منعقد ہورہے ہیں جبکہ امریکا، برطانیہ اور یورپی ممالک میں مقیم مسلمان بھی آج عیدالاضحیٰ منا رہے ہیں