پاک چین تعلقات نئی اسٹریٹجک بلندی پر: مشترکہ اعلامیے میں “چین پاکستان سکیورٹی پارٹنرشپ” کے قیام

وزیراعظم پاکستان کے دورہ چین کے اختتام پر دونوں ممالک کی جانب سے ایک جامع اور انتہائی اہم مشترکہ اعلامیہ جاری کیا گیا ہے، جس کے تحت پاک چین اسٹریٹجک تعلقات کو نئی بلندیوں پر لے جانے اور “نئے دور کی بین الاقوامی برادری” کے قیام پر مکمل اتفاق کیا گیا ہے۔ اعلامیے میں دفاع، معیشت، خلائی ٹیکنالوجی اور علاقائی سلامتی سمیت متعدد شعبوں میں تاریخی فیصلوں کی توثیق کی گئی ہے۔

اعلامیے کے مطابق، چین نے پاکستان کی خودمختاری، سلامتی اور علاقائی سالمیت کے لیے اپنی غیر متزلزل حمایت کا عزم دہرایا ہے، جبکہ پاکستان نے ‘ون چائنا پالیسی’ کی مکمل حمایت کرتے ہوئے تائیوان کو چین کا اٹوٹ حصہ قرار دیا ہے۔ چوان فریقین نے عالمی نظام میں یکطرفہ اقدامات کی مخالفت اور کثیر القطبی (Multipolar) دنیا کی حمایت کا اعادہ کیا ہے۔

“چین پاکستان سکیورٹی پارٹنرشپ” اور انسدادِ دہشت گردی

اعلامیے کا سب سے اہم پہلو دفاعی اور سیکیورٹی تعاون کو نئی شکل دینا ہے:

• سکیورٹی پارٹنرشپ: دونوں ممالک نے باقاعدہ طور پر ’’چین پاکستان سکیورٹی پارٹنرشپ‘‘ کے قیام پر اتفاق کیا ہے تاکہ خطے میں امن و استحکام کے لیے مشترکہ کردار ادا کیا جا سکے۔

• دہشت گردی کے خلاف یکجا مؤقف: چین، پاکستان اور افغانستان کے درمیان سہ فریقی رابطوں میں پیش رفت کا خیرمقدم کرتے ہوئے تحریک طالبان پاکستان (TTP) اور ایسٹ ترکستان اسلامک موومنٹ (ETIM) کے خلاف واضح مؤقف اپنایا گیا ہے۔

• دوہرے معیار کی مخالفت: مشترکہ اعلامیے میں دہشت گردی کے معاملے پر عالمی سطح پر برتے جانے والے دوہرے معیار کی سخت مخالفت کی گئی ہے۔

سی پیک 2.0، اڑان پاکستان اور معاشی تعاون

معاشی محاذ پر چین نے پاکستان کی معاشی بحالی کی کوششوں اور حکومت کے “اڑان پاکستان” پروگرام کو زبردست سراہا ہے۔ دونوں ممالک نے اقتصادی راہداری کے دوسرے مرحلے (سی پیک 2.0) کو تیز رفتاری سے آگے بڑھانے کا اعلان کیا ہے:

• گوادر اور خنجراب: گوادر پورٹ کو علاقائی رابطہ مرکز بنانے کا فیصلہ کیا گیا ہے جبکہ خنجراب راہداری کو بارہ مہینے مزید فعال رکھنے پر زور دیا گیا ہے۔

• صنعتی و زرعی شعبہ: معدنیات، توانائی، صنعتی پارکس کی تعمیر اور زرعی شعبے میں تعاون بڑھانے کا اعلان کیا گیا ہے۔

• انسانی وسائل کی ترقی: چین نے سال 2025 سے 2029 تک پاکستانی ہنرمندوں اور حکام کے لیے 3,000 تربیتی مواقع فراہم کرنے کے عزم کو دہرایا ہے۔

خلائی مشن اور جدید ٹیکنالوجی میں تاریخی اشتراک

پاک چین اعلامیے میں ٹیکنالوجی کے میدان سے متعلق ایک سنسنی خیز پیش رفت سامنے آئی ہے:

پاکستانی خلا باز چینی اسپیس اسٹیشن جائیں گے:

دونوں ممالک نے مصنوعی ذہانت (AI)، ڈیجیٹل معیشت اور خلائی تعاون میں اشتراک بڑھانے کا فیصلہ کیا ہے۔ اس معاہدے کے تحت پاکستانی خلا بازوں کو چین میں جدید ترین تربیت دی جائے گی اور جلد ہی کسی پاکستانی خلا باز کو چینی اسپیس اسٹیشن کے مشن میں شامل کیے جانے کا قوی امکان ہے۔

مسئلہ کشمیر، اسلام آباد مذاکرات اور عالمی سفارت کاری

عالمی و علاقائی امور پر چین نے پاکستان کی کثیرالجہتی سفارت کاری اور اقوام متحدہ کی سلامتی کونسل (UNSC) میں پاکستان کے فعال کردار کی کھل کر تعریف کی ہے:

• مسئلہ کشمیر: چین نے مسئلہ کشمیر کو ایک دیرینہ تاریخی تنازعہ قرار دیتے ہوئے اسے اقوام متحدہ کی متعلقہ قراردادوں اور دوطرفہ معاہدوں کے مطابق حل کرنے کی اپنی اصولی حمایت کا اعادہ کیا۔

• اسلام آباد مذاکرات کا اعتراف: اعلامیے میں چین نے ایران اور امریکہ کے درمیان کشیدگی کم کرنے اور جنگ بندی کی کوششوں میں پاکستان کے کلیدی کردار بالخصوص “اسلام آباد مذاکرات” کو زبردست خراجِ تحسین پیش کیا۔ دونوں ممالک نے مشرقِ وسطیٰ اور جنوبی ایشیا میں مستقل امن و استحکام کے لیے اپنا مشترکہ سفارتی کردار جاری رکھنے کے عزم کا اظہار کیا ہے۔