امریکا کو خطے میں مزید اڈے قائم کرنے کا موقع نہیں ملے گا: مجتبیٰ خامنہ ای

ایران کے سپریم لیڈر آیت اللہ مجتبیٰ خامنہ ای نے مسلم امہ کے عظیم سالانہ اجتماع ‘حج’ کے مبارک موقع پر عالمی استعمار اور صیہونی طاقتوں کے خلاف ایک انتہائی سخت اور دو ٹوک پیغام جاری کیا ہے۔ اپنے پیغام میں انہوں نے واضح کیا ہے کہ امریکا اب خطے میں نئے فوجی اڈے قائم کرنے میں کبھی کامیاب نہیں ہو سکے گا اور خلیجی طاقتیں اب امریکی افواج کے لیے ڈھال کا کردار ادا نہیں کریں گی۔

یہ اہم ترین بیان ایک ایسے نازک موڑ پر سامنے آیا ہے جب تہران اور واشنگٹن اپنے گزشتہ تین ماہ سے جاری شدید تنازع اور کشیدگی کے خاتمے کے لیے ایک سفارتی فریم ورک پر پسِ پردہ بات چیت کر رہے ہیں۔ واضح رہے کہ آیت اللہ مجتبیٰ خامنہ ای نے رواں سال مارچ میں اپنے والد اور سابق سپریم لیڈر آیت اللہ علی خامنہ ای کی امریکا اور اسرائیل کے فضائی حملوں میں شہادت کے بعد ایران کی قیادت سنبھالی تھی، اور وہ اب تک عوامی طور پر منظرِ عام پر نہیں آئے ہیں۔

ایرانی سپریم لیڈر نے اپنے پیغام میں “اللہ اکبر” کے نعرے کو مسلم امہ کا اصل ہتھیار قرار دیتے ہوئے کہا:

“اللہ اکبر کا نعرہ وہ طاقتور ہتھیار ہے جس نے امتِ مسلمہ اور مزاحمتی محاذ کے مجاہد نوجوانوں کے دلوں کو آپس میں جوڑ دیا ہے۔ یہ نظریاتی اتحاد اب صرف ایران تک محدود نہیں بلکہ لبنان، فلسطین، عراق، شام، افریقا اور یمن سے ہوتا ہوا پاکستان اور دنیا کی تمام آزادی پسند اقوام تک پھیل چکا ہے۔”

آیت اللہ مجتبیٰ خامنہ ای نے مشرقِ وسطیٰ کی بدلتی ہوئی صورتحال پر گفتگو کرتے ہوئے کہا کہ وقت کا پہیہ اب پیچھے نہیں گھوم سکتا۔ خطے میں صیہونی نظام (اسرائیل) اپنے کمزور ترین اور اختتامی مراحل میں داخل ہو چکا ہے جبکہ ایرانی انقلاب نے بیرونی قوتوں کے اثر و رسوخ کو جڑ سے اکھاڑ پھینکا ہے۔

امریکی بالادستی کو للکارتے ہوئے ان کا کہنا تھا کہ دشمن کو تباہ کن جوابی حملوں سے بالکل بے بس کر دیا گیا ہے، اور امریکی جارحیت کے سامنے ہتھیار نہ ڈال کر ایران نے سپر پاور کے منہ پر ایک زوردار تھپڑ رسید کیا ہے۔ ایران اور لبنان میں حاصل ہونے والی شاندار فتوحات اسی ایمانی جذبے کا نتیجہ ہیں۔

سپریم لیڈر نے دنیا بھر کے مسلم ممالک پر زور دیا کہ وہ بیرونی دباؤ اور ڈکٹیشن سے آزاد ہو کر اپنا خودمختار کردار ادا کریں کیونکہ خطے کی اقوام اب اپنے مستقبل کا فیصلہ خود کرنے کی صلاحیت رکھتی ہیں۔ انہوں نے کہا کہ ایک مشترکہ اور نئی “اسلامی تہذیب” کا قیام تمام مسلم ممالک کا واحد ہدف ہونا چاہیے۔

اپنے پیغام کے آخر میں انہوں نے عازمینِ حج سے اپیل کرتے ہوئے کہا کہ ہر مسلمان کا یہ اولین فرض ہے کہ وہ اسلام کے روشن مستقبل کے لیے اپنا حصہ ڈالے، اور اسی جذبے کے تحت اس سال حج کے موقع پر ہر کلمہ گو مسلمان کی زبان پر “مرگ بر امریکا” اور “مرگ بر اسرائیل” کا نعرہ ہونا چاہیے