عون چودھری کا فضل الرحمان سے شہدا کے لواحقین اور پوری قوم سے معافی مانگنے کا مطالبہ

وزیر مملکت برائے اوورسیز پاکستانیز عون چودھری نے جمعیت علمائے اسلام (ف) کے سربراہ مولانا فضل الرحمٰن کے حالیہ متنازع بیان پر سخت ردعمل کا اظہار کرتے ہوئے ان سے شہداء کے لواحقین اور پوری قوم سے فوری طور پر معافی مانگنے کا مطالبہ کیا ہے۔ عون چودھری نے دوٹوک الفاظ میں کہا کہ شہادت کسی نوکری یا تنخواہ کی مرہونِ منت نہیں ہوتی، بلکہ یہ عظیم رتبہ حب الوطنی، غیر متزلزل ایمان اور مادرِ وطن کے لیے جان نچھاور کرنے کے سچے جذبۂ قربانی سے حاصل ہوتا ہے۔ انہوں نے واضح کیا کہ پاک فوج کے جوان وطنِ عزیز کی سرحدوں کی حفاظت کی خاطر اپنی جانوں کا نذرانہ پیش کرتے ہیں اور پوری قوم ان کی اس لازوال قربانی کو قدر کی نگاہ سے دیکھتی ہے۔

وزیر مملکت کا مزید کہنا تھا کہ مولانا فضل الرحمٰن کا بیان انتہائی غیر ذمہ دارانہ ہے، جو وطن کی خاطر جانیں قربان کرنے والے سرفروشوں اور ان کے دکھی اہلخانہ کی کھلی توہین ہے۔ انہوں نے اس بات پر زور دیا کہ پاک فوج کے بہادر جوانوں اور اس کے عظیم شہداء کی قربانیوں کی بدولت ہی آج پاکستان کو پوری دنیا میں عزت کا مقام ملا ہے اور انہی کی بدولت پوری قوم امن و سکون کی زندگی گزار رہی ہے۔ عون چودھری نے اعادہ کیا کہ ہمیں اپنے شہداء پر فخر ہے اور ان کی قربانیوں کی توہین کسی صورت برداشت نہیں کی جائے گی۔