پنجاب میں عید الاضحیٰ کی تعطیلات کے دوران شدید ہیٹ ویو کا خدشہ

نیشنل ڈیزاسٹر مینجمنٹ اتھارٹی (NDMA) کے نیشنل ایمرجنسی آپریشنز سینٹر (NEOC) نے 26 سے 31 مئی 2026 تک ملک بھر میں متوقع شدید موسمی صورتحال کا تفصیلی جائزہ اور ہائی الرٹ جاری کر دیا ہے۔ الرٹ کے مطابق ملک کے بیشتر حصوں میں شدید گرمی کی لہر (Heatwave) اور درجہ حرارت 40 سے 48 ڈگری سینٹی گریڈ تک پہنچنے کا خدشہ ہے، جبکہ شمالی علاقوں میں تیز گرمی کے باعث گلیشیئرز پگھلنے، سیلاب اور لینڈ سلائیڈنگ کے شدید خطرات موجود ہیں۔

وزیراعظم پاکستان کی خصوصی ہدایت پر گرمی کی شدت اور دیگر ممکنہ خطرات کے پیش نظر این ڈی ایم اے نے قومی سطح پر تیاریوں کا جائزہ لیا ہے۔ این ڈی ایم اے کی ہدایات کی روشنی میں صوبائی ڈیزاسٹر مینجمنٹ اتھارٹیز (PDMAs) نے پیشگی اقدامات (Anticipatory Actions) شروع کر دیے ہیں، جن میں عوامی آگاہی مہم، ایمرجنسی رسپانس ٹیموں کی تعیناتی، کولنگ سینٹرز کا قیام اور طبی سہولیات کی بہتری شامل ہے۔

این ڈی ایم اے کے مطابق، پہاڑی علاقوں میں غیر معمولی گرمی کی وجہ سے گلیشیئرز تیزی سے پگھل رہے ہیں اور گلیشیائی جھیلوں کے ٹوٹنے (GLOF) کا خطرہ بڑھ گیا ہے۔

• سیلابی صورتحال کا خدشہ: درکوٹ، لاشٹ، ریشن، بونی، بد سوات، شسپر، گلگن، ہنارچی، روشن اور کمراٹ کے ندی نالوں اور دریاؤں میں طغیانی آ سکتی ہے۔

• رابطہ سڑکیں اور شاہراہیں: شمشال، عطا آباد جھیل، کریم آباد، گلمیت، ششکت بالا اور پاسو کے درمیان رابطہ سڑکیں لینڈ سلائیڈنگ کی زد میں ہیں۔ اس کے علاوہ شگر ویلی روڈ، سکردو روڈ، دیوسائی روڈ اور شاہراہِ قراقرم پر ٹریفک معطل ہونے کا شدید خدشہ ہے۔

عوامی تحفظ اور لو لگنے (Heatstroke) سے بچاؤ کے لیے این ڈی ایم اے نے تمام سرکاری و نجی اسکولوں، کالجوں اور سیکیورٹی اداروں کے لیے یونیفارم میں تبدیلی کی ہدایت جاری کی ہے:

“شدید گرمی کے پیش نظر اس امر کو یقینی بنایا جائے کہ ملازمین اور طلبہ کا یونیفارم ہلکے رنگ کا اور ڈھیلا ڈھالا ہو۔ ہلکے رنگ کا لباس کم گرمی جذب کرتا ہے اور ڈھیلا لباس جسم میں ہوا کی گردش برقرار رکھ کر سانس اور ہیٹ اسٹروک کے مسائل سے بچاتا ہے۔”

این ڈی ایم اے نے صوبائی اداروں کو حساس علاقوں میں حفاظتی انتظامات تیز کرنے کا حکم دیتے ہوئے عوام کو غیر ضروری سفر سے گریز کرنے کی تاکید کی ہے۔ پہاڑی علاقوں کے رہائشیوں اور وہاں موجود سیاحوں کو مقامی انتظامیہ کے ساتھ تعاون کرنے اور موسم کی بدلتی صورتحال سے باخبر رہنے کی ہدایت کی گئی ہے۔ کسی بھی ہنگامی الرٹ اور مستند معلومات کے لیے عوام کو “پاک این ڈی ایم اے ڈیزاسٹر الرٹ” موبائل ایپ ڈاؤن لوڈ کرنے کا مشورہ دیا گیا ہے۔