2سال میں پیٹرولیم لیوی سے 2 ہزار 725 ارب وصول، رقم آئی ایم ایف کے 2 قرض پروگراموں سے بھی زیادہ نکلی

وفاقی حکومت نے گزشتہ 2 برس کے دوران پیٹرولیم لیوی کی مد میں شہریوں سے 2 ہزار 725 ارب روپے سے زائد کی ریکارڈ وصولی کی ہے، جو آئی ایم ایف کے 2 قرض پروگراموں کی مجموعی مالیت سے بھی زیادہ قرار دی جا رہی ہے۔
سرکاری دستاویزات کے مطابق اپریل 2024 سے مارچ 2026 تک حکومت نے پیٹرولیم لیوی کی مد میں مجموعی طور پر 2 ہزار 725 ارب روپے وصول کیے۔
دستاویزات میں بتایا گیا ہے کہ آئی ایم ایف کے جاری 2 قرض پروگراموں کی مجموعی رقم موجودہ شرح تبادلہ کے مطابق پاکستانی کرنسی میں تقریباً 2 ہزار 340 ارب روپے بنتی ہے، جبکہ پیٹرولیم لیوی سے حاصل کی گئی رقم اس سے کہیں زیادہ رہی۔
اعداد و شمار کے مطابق رواں مالی سال 2026-2025 کے پہلے 9 ماہ، یعنی جولائی 2025 سے مارچ 2026 تک ایک ہزار 205 ارب روپے سے زائد کی لیوی وصول کی گئی۔
اسی طرح مالی سال 2025-2024 میں حکومت نے ایک ہزار 220 ارب 21 کروڑ روپے پیٹرولیم لیوی کی مد میں جمع کیے، جبکہ اپریل سے جون 2024 کی سہ ماہی میں یہ وصولیاں 299 ارب 63 کروڑ روپے رہیں۔
معاشی ماہرین کے مطابق پیٹرولیم لیوی میں مسلسل اضافے نے عوام پر مالی دباؤ مزید بڑھا دیا ہے۔