امریکی صدر کا سعودی عرب، قطر اور پاکستان سمیت مسلم ممالک سے ابراہیمی معاہدے میں شمولیت کا مطالبہ

امریکی صدر ڈونلڈ ٹرمپ نے سعودی عرب، قطر، پاکستان اور دیگر مسلم ممالک پر زور دیا ہے کہ وہ فوری طور پر ابراہیمی معاہدے کا حصہ بن جائیں۔

اپنے سماجی رابطے کے پلیٹ فارم پر جاری بیان میں ڈونلڈ ٹرمپ نے کہا کہ ایران کے ساتھ مذاکرات میں مثبت پیشرفت جاری ہے اور امریکا ایک جامع اور مؤثر معاہدے کی کوشش کر رہا ہے۔

انہوں نے کہا کہ یا تو ایک بہترین معاہدہ ہوگا یا پھر کوئی معاہدہ نہیں ہوگا، اور اگر مذاکرات ناکام ہوئے تو جنگ پہلے سے زیادہ شدت اختیار کر سکتی ہے۔

ٹرمپ کے مطابق انہوں نے سعودی ولی عہد محمد بن سلمان، متحدہ عرب امارات کے صدر محمد بن زاید، قطر کے امیر شیخ تمیم بن حمد آل ثانی، پاکستان کے آرمی چیف فیلڈ مارشل سید عاصم منیر، ترکیے کے صدر رجب طیب اردوان، مصر کے صدر عبدالفتاح السیسی، اردن کے شاہ عبداللہ دوم اور بحرین کے شاہ حمد بن عیسیٰ آل خلیفہ سمیت مختلف رہنماؤں سے تفصیلی گفتگو کی۔

امریکی صدر نے کہا کہ امریکا کی جانب سے اس پیچیدہ معاملے کے حل کے لیے کی جانے والی کوششوں کے بعد ضروری ہے کہ زیادہ تر مسلم ممالک ابراہیمی معاہدے میں شامل ہوں۔

انہوں نے کہا کہ متحدہ عرب امارات اور بحرین پہلے ہی اس معاہدے کا حصہ ہیں جبکہ سعودی عرب، قطر، پاکستان، ترکیے، مصر اور اردن کو بھی اس تاریخی معاہدے میں شامل ہونا چاہیے۔

ٹرمپ نے مزید کہا کہ بعض ممالک کے پاس معاہدے میں شامل نہ ہونے کی وجوہات ہو سکتی ہیں، تاہم بیشتر ممالک کو اس عمل کا حصہ بننے کے لیے تیار رہنا چاہیے۔