LIVE TV
Watch Now
Gold:
Intl: /g (22K) PK: /g (22K)
Stocks:
NY: ▲ ▼
China: ▲ ▼
Pakistan: ▲ ▼
India: ▲ ▼
TV ONE Logo
اہم خبریں
ربیعہ احسن قتل کیس میں اہم پیشرفت، اہل خانہ نے ملزم کو معاف کر دیا ڈیفنس میں 11 سالہ گھریلو ملازم پر تشدد، گرم چائے کی پتیلی الٹ دی گئی روہنگیا میں مسلمانوں کو قتل عام اور جنسی تشدد کا نشانہ بنایا گیا،عالمی عدالت انصاف سٹاک مارکیٹ میں تیزی، کاروبار کا مثبت رجحان رہا جے یو آئی رہنماؤں کے خلاف مقدمہ، مفتی ابرار احمد کو وارنٹ کی تعمیل کروا دی عالمی و مقامی سطح پر سونے چاندی کی قیمتوں میں کمی امریکی، چینی اور روسی صدور کی چین میں تاریخی ملاقات، سرد جنگ کی ذہنیت ترک کرنے پر زور جنگ کے طریقے تبدیل، مسلح افواج جدید تقاضوں کے مطابق تیار ہیں: نیول چیف کوئٹہ: مسافر کوچ اور ایل پی جی باؤزر میں تصادم، خاتون اور بچے سمیت 10 افراد جاں بحق پارٹی کیخلاف ہتک آمیز بیانات، مرکزی مسلم لیگ کا عظمیٰ بخاری کو ہرجانے کا نوٹس مریم نواز نے سی ایم سولر پینل سکیم فیز ٹو کی منظوری دے دی شمالی وزیرستان میں فورسز کا کامیاب سرچ آپریشن، بارودی مواد کا بڑا ٹھکانہ تباہ عدالت کا 15 روز میں نادرا ای بیلٹنگ کا عمل مکمل کرنے کا حکم ایشیا پیسیفک کی ترقی کیلئے آزاد تجارت اور معاشی انضمام ضروری ہے: چینی صدر چترال: پاک فوج اور فرنٹیئر کور کے زیر اہتمام فری میڈیکل کیمپ کا انعقاد

 بیوی کی رضامندی کے بغیر خلع ممکن نہیں:سپریم کورٹ کا اہم فیصلہ

Web Desk

24 May 2026

سپریم کورٹ آف پاکستان نے خلع اور گھریلو تنازعات سے متعلق اہم اور جامع فیصلہ جاری کرتے ہوئے قرار دیا ہے کہ بیوی کی واضح، باخبر اور غیر مبہم رضامندی کے بغیر خلع دینا قانونی طور پر درست نہیں۔

چیف جسٹس یحییٰ آفریدی کی سربراہی میں تین رکنی بینچ نے تفصیلی فیصلہ جاری کیا، جسے جسٹس شاہد بلال حسن نے تحریر کیا۔ بارہ صفحات پر مشتمل فیصلے میں عدالت نے خاندانی مقدمات کے طریقۂ کار، گھریلو تشدد اور خلع کے قانونی تقاضوں پر تفصیلی رہنمائی فراہم کی۔

عدالت عظمیٰ نے قرار دیا کہ اگر بیوی نے ظلم اور تشدد کی بنیاد پر مقدمہ دائر کیا ہو تو اسے زبردستی خلع میں تبدیل کرنا خاتون کے مالی حقوق کو متاثر کر سکتا ہے، اس لیے عدالت بیوی کو یہ اختیار دے کہ وہ ظلم کے دعوے پر قائم رہنا چاہتی ہے یا خلع قبول کرنا چاہتی ہے۔

فیصلے میں کہا گیا کہ اگر ظلم ثابت نہ بھی ہو مگر ازدواجی تعلق عملی طور پر ختم ہو چکا ہو تو بیوی کو انتخاب کا حق دینا ضروری ہے، جبکہ عدالت کسی مردہ رشتے کو زبردستی بحال نہیں کرا سکتی۔

سپریم کورٹ نے گھریلو تشدد کی تعریف کو وسیع قرار دیتے ہوئے کہا کہ جسمانی تشدد کے ساتھ ذہنی اذیت، تذلیل، دباؤ، محرومی اور جذباتی تکلیف بھی ظلم میں شامل ہیں۔ عدالت کے مطابق گھریلو معاملات میں ناممکن ثبوت، جیسے عینی شاہد یا ابتدائی رپورٹ کا مطالبہ نہیں کیا جانا چاہیے۔

عدالت نے واضح کیا کہ خاندانی مقدمات میں ثبوت کا معیار “غالب امکان” ہوتا ہے جبکہ فوجداری مقدمات میں “شک سے بالاتر” معیار لاگو ہوتا ہے، اس لیے فیملی کورٹس کو فوجداری معیارِ ثبوت سول مقدمات میں استعمال کرنے سے گریز کرنا چاہیے۔

فیصلے کے مطابق زیر سماعت کیس میں شادی انیس ستمبر دو ہزار سولہ کو ہوئی جبکہ آٹھ اکتوبر دو ہزار سولہ کو علیحدگی کا مقدمہ دائر کر دیا گیا تھا۔ عدالت نے قرار دیا کہ قلیل مدت میں بھی ظلم ہو سکتا ہے اور ہر مقدمہ اپنے حقائق کے مطابق دیکھا جائے گا۔

سپریم کورٹ نے قرار دیا کہ خاتون ظلم ثابت کرنے میں ناکام رہی، اس لیے نچلی عدالتوں کے فیصلے برقرار رہیں گے، تاہم خلع کے طریقۂ کار اور مالی حقوق کے تعین سے متعلق فیصلہ جزوی طور پر کالعدم قرار دے کر معاملہ دوبارہ فیملی کورٹ بھیج دیا گیا۔

عدالت نے ہدایت کی کہ فیملی کورٹ خاتون کا حتمی بیان ریکارڈ کرے اور اس کی مرضی معلوم کرے۔ اگر خاتون خلع کا انتخاب کرے تو فیصلہ قانونی تقاضوں کے مطابق ہوگا، جبکہ ظلم کے دعوے پر قائم رہنے کی صورت میں کیس کا فیصلہ اسی بنیاد پر کیا جائے گا۔ سپریم کورٹ نے فیملی کورٹ کو تیس دن میں مقدمہ نمٹانے کی ہدایت بھی جاری کی۔