وزیرِ اعظم شہباز شریف چین کے چار روزہ دورے کے پہلے مرحلے میں ہانگژو روانہ

وزیرِاعظم محمد شہباز شریف اپنے چار روزہ سرکاری دورۂ چین کے پہلے مرحلے میں ہانگژو روانہ ہو گئے ہیں۔ اس اہم اسٹریٹجک دورے میں نائب وزیرِاعظم و وزیرِ خارجہ سینیٹر محمد اسحاق ڈار، وزیرِ منصوبہ بندی احسن اقبال، وزیرِ اطلاعات و نشریات عطاء اللہ تارڑ، وزیرِ آئی ٹی شزہ فاطمہ خواجہ اور معاون خصوصی طارق فاطمی بھی وزیرِاعظم کے ہمراہ ہیں۔ اپنے دورے کے آغاز میں وزیرِاعظم ہانگژو میں ژجیانگ صوبے کے پارٹی سیکریٹری سے ملاقات کریں گے اور پاک چین اقتصادی راہداری (CPEC) کے دوسرے مرحلے کے تحت دونوں ممالک کی کمپنیوں کے مابین تعاون بڑھانے کے لیے منعقدہ خصوصی ‘بزنس فورم’ میں شرکت کریں گے، جہاں مختلف معاہدوں اور مفاہمتی یادداشتوں کا تبادلہ بھی کیا جائے گا۔ ہانگژو میں قیام کے دوران وزیرِاعظم معروف چینی کمپنیوں کے سی ای اوز سے ملاقاتوں کے علاوہ عالمی شہرت یافتہ ای کامرس کمپنی ‘علی بابا’ کے ہیڈکوارٹرز کا دورہ بھی کریں گے، جہاں تعاون کی یادداشتوں پر دستخط ہوں گے۔

دورے کے دوسرے مرحلے میں وزیرِاعظم شہباز شریف بیجنگ پہنچیں گے، جہاں ان کی چین کے صدر شی جن پنگ اور وزیرِاعظم لی چیانگ سے اعلیٰ سطحی ملاقاتیں شیڈول ہیں۔ یہ دورہ پاک چین سفارتی تعلقات کی 75 ویں سالگرہ کے موقع پر ہو رہا ہے، جس کے حوالے سے وزیرِاعظم بیجنگ میں ایک خصوصی تقریب میں بھی شرکت کریں گے۔ علاوہ ازیں، وہ زرعی شعبے میں جدت اور تعاون کے فروغ کے لیے ‘چائنہ اکیڈمی آف ایگری کلچر سائنسز’ (CAAS) کا دورہ بھی کریں گے۔ سفارتی ماہرین کے مطابق، وزیرِاعظم کا یہ دورہ پاکستان اور چین کے برادرانہ تعلقات میں نئی جہتوں کا اضافہ کرے گا، جس کا بنیادی فوکس سی پیک فیز 2 کے تحت دونوں ممالک کی نجی اور سرکاری کمپنیوں کے درمیان کاروباری و اقتصادی شراکت داری کو مضبوط بنانا ہے۔