بیرونی سرمایہ کاری میں اضافے کیلئے اقدامات اٹھا رہے ہیں: وزیراعظم

وزیراعظم محمد شہباز شریف سے قطر کے معروف ’تعمیر گروپ‘ کے بانی محمد حسین آل علی کی قیادت میں ایک اعلیٰ سطح کے وفد نے ملاقات کی، جس میں نائب وزیراعظم و وزیر خارجہ سینیٹر محمد اسحاق ڈار، وفاقی وزراء احد خان چیمہ، عطاء اللہ تارڑ، وزیر مملکت بلال اظہر کیانی اور دیگر اعلیٰ حکام بھی شریک ہوئے۔ ملاقات کے دوران وزیراعظم نے قطر کو پاکستان کا دیرینہ اور مخلص دوست قرار دیتے ہوئے کہا کہ حکومت ملک میں بیرونی سرمایہ کاری کے فروغ کے لیے ترجیحی بنیادوں پر اقدامات اٹھا رہی ہے اور خصوصی سرمایہ کاری سہولت کونسل (SIFC) کے ذریعے سرمایہ کاروں کی راہ میں حائل تمام رکاوٹوں کو کامیابی سے دور کیا گیا ہے۔ انہوں نے واضح کیا کہ پاکستان میں سیاحت، ہوٹلنگ، ہاسپیٹیلٹی، رئیل اسٹیٹ اور تعمیرات کے شعبوں میں سرمایہ کاری کی وسیع استعداد موجود ہے، اور اس سلسلے میں انہوں نے متعلقہ حکام کو قطری گروپ کو ہر ممکن معاونت اور سہولیات فراہم کرنے کی سخت ہدایت جاری کیں۔ دوسری جانب، تعمیر گروپ کے بانی محمد حسین آل علی نے پاکستان کے ہاسپیٹیلٹی اور رئیل اسٹیٹ کے شعبوں میں جاری منصوبوں پر بریفنگ دیتے ہوئے مزید سرمایہ کاری بڑھانے میں گہری دلچسپی کا اظہار کیا، اور وزیراعظم شہباز شریف کی متحرک قیادت میں کاروبار دوست ماحول اور ایس آئی ایف سی کے تحت سرمایہ کاروں کو دی جانے والی سہولیات کو بھرپور انداز میں سراہا۔