پاک چین دوستی کے 75 برس مکمل، اسٹیٹ بینک 75 روپے کا یادگاری سکّہ جاری کرے گا

پاکستان اور چین کے سفارتی تعلقات کے 75 برس مکمل ہونے پر اسٹیٹ بینک کی جانب سے 75 روپے مالیت کا خصوصی یادگاری سکّہ جاری کرنے کا اعلان کیا گیا ہے۔

اسٹیٹ بینک کے مطابق حکومتِ پاکستان نے پاک چین سفارتی تعلقات کی پچھترویں سالگرہ کے موقع پر یادگاری سکّہ جاری کرنے کا فیصلہ کیا ہے۔

مرکزی بینک کا کہنا ہے کہ یہ خصوصی سکّہ 25 مئی 2026ء سے ملک بھر میں عوام کے لیے دستیاب ہوگا۔

اعلامیے کے مطابق اسٹیٹ بینک کی بینکنگ سروسز کارپوریشن کے دفاتر میں قائم ایکسچینج کاؤنٹرز پر شہری یہ سکّہ حاصل کر سکیں گے۔

اسٹیٹ بینک نے بتایا کہ پاکستان اور چین کے درمیان باضابطہ سفارتی تعلقات 21 مئی 1951ء کو قائم ہوئے تھے، جنہیں دونوں ممالک کی مضبوط دوستی کی علامت سمجھا جاتا ہے۔

اعلامیے میں مزید کہا گیا ہے کہ یادگاری سکّہ گول شکل میں تیار کیا گیا ہے جبکہ اس کے کنارے دندانے دار ہوں گے۔