190ملین پاؤنڈ کیس، اسلام آباد ہائیکورٹ کا اپیل پر مزید مہلت دینے کا حکم، سماعت 18 جون تک ملتوی

اسلام آباد ہائیکورٹ میں 190 ملین پاؤنڈ کیس میں بانی پی ٹی آئی کی اپیل پر گزشتہ سماعت کا تحریری حکم نامہ جاری کر دیا گیا ہے۔

عدالت نے کیس کی مزید سماعت کے لیے مہلت دیتے ہوئے کارروائی 18 جون تک ملتوی کر دی ہے۔

تحریری حکم نامے کے مطابق اڈیالہ جیل کے سپرنٹنڈنٹ کو پاور آف اٹارنی فوری طور پر پراسیس کرنے کی ہدایت جاری کی گئی ہے، جبکہ قانون نافذ کرنے والے اداروں کو بھی اس پر سختی سے عملدرآمد یقینی بنانے کا حکم دیا گیا ہے۔

عدالت نے واضح کیا ہے کہ اگر وکیل سلمان صفدر طبی وجوہات کے باعث دستیاب نہ ہوں تو ایسی صورت میں متبادل وکیل دلائل پیش کرے گا۔

مزید کہا گیا ہے کہ اگر اپیل پر دلائل پیش نہ کیے گئے تو عدالت دستیاب ریکارڈ کی بنیاد پر فیصلہ سنائے گی۔

یہ حکم چیف جسٹس سرفراز ڈوگر اور جسٹس محمد آصف پر مشتمل بینچ نے 190 ملین پاؤنڈ کیس کی اپیلوں کی سماعت کے دوران جاری کیا۔