پرنس رحیم آغا خان کا پاکستان پہنچنے پر شاندار استقبال، صدر ہاؤس میں گارڈ آف آنر اور اعلیٰ سطح کی ملاقاتیں

اسماعیلی برادری کے 50 ویں روحانی پیشوا پرنس شاہ رحیم الحسینی آغا خان پنجم 6 روزہ دورے پر پاکستان پہنچ گئے، جہاں ان کا نور خان ایئر بیس پر صدر آصف علی زرداری نے استقبال کیا۔

ایوان صدر پہنچنے پر معزز مہمان کو مسلح افواج کے چاق و چوبند دستے نے گارڈ آف آنر پیش کیا اور سلامی دی۔

صدر مملکت کی جانب سے پرنس آغا خان کے اعزاز میں عشائیہ دیا گیا جس میں وزیر اعظم، فیلڈ مارشل سید عاصم منیر، نائب وزیر اعظم اور دیگر اہم شخصیات شریک ہوئیں۔

دورے کے دوران پرنس آغا خان کی صدر مملکت، آصفہ بھٹو زرداری اور بلاول بھٹو زرداری سے ملاقات ہوئی، جس میں پاکستان میں مختلف سماجی شعبوں میں تعاون پر تبادلہ خیال کیا گیا۔

صدر مملکت نے آغا خان ڈیولپمنٹ نیٹ ورک کی صحت، تعلیم اور ماحولیات کے شعبوں میں خدمات کو سراہتے ہوئے مستقبل میں تعاون کو مزید فروغ دینے کے عزم کا اظہار کیا۔

پرنس آغا خان اپنے دورے کے دوران گلگت بلتستان اور چترال سمیت شمالی علاقہ جات میں مختلف ملاقاتیں کریں گے۔