ایشین جونیئر سکواش چیمپئن شپ کیلئے پاکستانی ٹیم کا اعلان کر دیا گیا

چین میں رواں ماہ شروع ہونے والی باوقار ’ایشین جونیئر اسکواش چیمپئن شپ‘ کے لیے پاکستان اسکواش فیڈریشن نے قومی جونیئر ٹیم کے ناموں کا باقاعدہ اعلان کر دیا ہے۔ پاکستان کی جانب سے اعلان کردہ اس 7 رکنی مخصوس اسکواڈ میں 5 بوائز (مینز) اور 2 گرلز (ویمنز) کھلاڑی شامل ہیں، جو مختلف عمر کی کیٹیگریز میں گرین شرٹس کی نمائندگی کرتے ہوئے ٹائٹل کے حصول کے لیے میدان میں اتریں گے۔

ٹیم کی سب سے دلچسپ اور منفرد بات دو سگی بہنوں، سحرش علی اور ماہنور علی کی شمولیت ہے، جو گرلز انڈر 15 کیٹیگری میں بیک وقت پاکستان کی نمائندگی کا اعزاز حاصل کریں گی۔ دوسری جانب بوائز کیٹیگریز میں پاکستان کے بہترین جونیئر ٹیلنٹ کا انتخاب کیا گیا ہے؛ جس کے تحت بوائز انڈر 19 میں عبداللہ نواز، انڈر 17 میں نعمان خان اور انڈر 13 کیٹیگری میں مصطفیٰ خان کو پاکستانی اسکواڈ کا حصہ بنایا گیا ہے۔ اس کے علاوہ بوائز انڈر 15 کی اہم ترین کیٹیگری میں احمد رایان خلیل اور سہل عدنان پاکستان کی طرف سے کورٹ میں اپنے جوہر دکھائیں گے۔ یاد رہے کہ ایشین جونیئر اسکواش چیمپئن شپ کا یہ سنسنی خیز میلہ 20 سے 24 مئی تک چین میں سجایا جائے گا، جس کے لیے قومی کھلاڑیوں کی تیاریاں آخری مراحل میں داخل ہو چکی ہیں۔