الیکشن کمیشن آزاد کشمیر کا پی ٹی آئی کی رجسٹریشن مسترد کرنا امتیازی سلوک ہے: بیرسٹر گوہر 

چیئرمین پاکستان تحریک انصاف بیرسٹر گوہر نے الزام عائد کیا ہے کہ الیکشن کمیشن آزاد کشمیر نے تحریک انصاف کی رجسٹریشن بلاجواز طور پر مسترد کر دی ہے، جسے انہوں نے واضح امتیازی سلوک قرار دیا ہے۔

بیرسٹر گوہر نے کہا کہ تحریک انصاف کے ساتھ ایک بار پھر امتیازی رویہ اختیار کیا جا رہا ہے اور اس مرتبہ یہ سلوک آزاد کشمیر میں سامنے آیا ہے۔

انہوں نے کہا کہ آزاد کشمیر میں انتخابات جولائی میں شیڈول ہیں جبکہ آزاد کشمیر ہائی کورٹ نے آزاد کشمیر الیکشن ایکٹ 2020 کے تحت تمام سیاسی جماعتوں کی نئی رجسٹریشن کی ہدایت دی تھی۔ تحریک انصاف آزاد کشمیر نے 20 نومبر 2023 کو تمام مطلوبہ دستاویزات جمع کرا دی تھیں۔

بیرسٹر گوہر کے مطابق پاکستان پیپلز پارٹی، مسلم لیگ ن، جمعیت علمائے اسلام اور جماعت اسلامی کی رجسٹریشن مکمل کی جا چکی ہے، تاہم تحریک انصاف کی درخواست کو طویل عرصے تک زیر التوا رکھا گیا۔

انہوں نے مزید کہا کہ تقریباً 30 ماہ بعد الیکشن کمیشن آزاد کشمیر نے پریس ریلیز کے ذریعے تحریک انصاف کی رجسٹریشن سے انکار کیا ہے جو بلاجواز اور غیر منصفانہ فیصلہ ہے۔

بیرسٹر گوہر نے الزام لگایا کہ آزاد کشمیر کے انتخابات میں تحریک انصاف کو مساوی مواقع فراہم نہیں کیے جا رہے، جو جمہوری اصولوں کی خلاف ورزی ہے۔