ایف آئی اے کا بڑا اقدام؛ ورچوئل کرنسی کو فراڈ سے پاک کرنے کے لیے خصوصی انویسٹی گیشن سیل قائم

وفاقی تحقیقاتی ادارے (FIA) نے ملک میں ورچوئل اور کرپٹو کرنسی کے ذریعے ہونے والے فراڈ، منی لانڈرنگ اور غیر قانونی سرگرمیوں کو روکنے کے لیے ایک انتہائی اہم قدم اٹھایا ہے۔ ایف آئی اے ہیڈ کوارٹرز میں باضابطہ طور پر “ورچوئل کرنسی انویسٹی گیشن سیل” قائم کر دیا گیا ہے، جس کا نوٹیفکیشن ڈائریکٹر کاؤنٹر ٹیررازم ونگ اطہر وحید نے جاری کر دیا ہے۔یہ خصوصی سیل ایف آئی اے کے کاؤنٹر ٹیررازم ونگ (CTW) کے ماتحت کام کرے گا۔ اس کے بنیادی مقاصد اور دائرہ اختیار میں  یہ ونگ کرپٹو کرنسی، ورچوئل کرنسی، بلاک چین ٹرانزیکشنز اور کولڈ والٹ اکاؤنٹس کی کڑی نگرانی کرے گا۔ کرپٹو کرنسی کے ذریعے ہونے والی ٹیرر فنانسنگ (دہشت گردوں کی مالی معاونت)، منی لانڈرنگ اور دیگر مالیاتی جرائم کے خلاف فوری ایکشن لیا جائے گا۔ یہ سیل ایف بی آر، نیب، پولیس اور سی ٹی ڈی سمیت تمام وفاقی اداروں کی جانب سے بھیجے گئے ریفرنسز پر کارروائی کرنے کا مجاز ہوگا۔خصوصی سیل نہ صرف ملک کے اندر بلکہ بین الاقوامی اداروں کے ساتھ مل کر بھی ورچوئل کرنسی کے ذریعے ہونے والے سرحد پار جرائم کے خلاف مشترکہ آپریشنز کرے گا۔ ایف آئی اے کے مطابق اس ونگ کے قیام کا ایک بڑا مقصد فنانشل ایکشن ٹاسک فورس (FATF) کے بین الاقوامی معیارات پر پورا اترنا ہے تاکہ پاکستان کے مالیاتی نظام کو مزید محفوظ اور شفاف بنایا جا سکے۔ اس اقدام سے جہاں ورچوئل کرنسی میں سرمایہ کاری کرنے والے شہریوں کو فراڈ سے تحفظ ملے گا، وہاں ملک دشمن عناصر کے لیے ڈیجیٹل ذرائع سے رقوم کی منتقلی ناممکن بنا دی جائے گی۔