پاکستان میں بچوں کے خون میں سیسے کی خطرناک سطح کا انکشاف؛ ہری پور میں 88 فیصد بچے متاثر

اسلام آباد: وفاقی وزارت صحت اور یونیسیف کی جانب سے جاری کردہ ایک مشترکہ تحقیقاتی رپورٹ نے پاکستان میں بچوں کی صحت کے حوالے سے خطرے کی گھنٹی بجا دی ہے۔ رپورٹ کے مطابق، ملک کے سات بڑے شہروں کے ہائی رسک علاقوں میں 40 فیصد بچوں کے خون میں سیسہ (لیڈ) پایا گیا ہے۔ سب سے تشویشناک صورتحال ہری پور کے صنعتی علاقے ہٹڑ میں دیکھی گئی، جہاں 88 فیصد بچوں میں سیسے کی بلند سطح ریکارڈ کی گئی۔ یہ تحقیق 12 سے 36 ماہ کے بچوں پر کی گئی اور اس کے لیے 2 ہزار سے زائد خون کے نمونوں کا تجزیہ کیا گیا۔ رپورٹ میں انکشاف کیا گیا ہے کہ سیسہ بچوں کی دماغی نشوونما، ذہانت، یادداشت اور قوت مدافعت کو مستقل بنیادوں پر متاثر کرتا ہے، جس کے اثرات ناقابلِ واپسی ہو سکتے ہیں۔