سنٹرل ڈرگز لیبارٹری کراچی کو WHO پری کوالیفیکیشن حاصل

ڈرگ ریگولیٹری اتھارٹی آف پاکستان (DRAP) نے ملک کے نظامِ صحت میں ایک بڑی کامیابی حاصل کر لی ہے۔ وزارتِ صحت کے مطابق سینٹرل ڈرگز لیبارٹری کراچی نے عالمی ادارہ صحت (WHO) کی “پری کوالیفیکیشن” کامیابی سے حاصل کر لی ہے، جس کے بعد اب اس لیبارٹری کی ٹیسٹنگ سروسز کو بین الاقوامی سطح پر تسلیم کیا جائے گا۔ وفاقی وزیر صحت مصطفیٰ کمال نے اس سنگ میل پر ڈریپ کی ٹیم کو مبارکباد دیتے ہوئے کہا کہ یہ کامیابی “میڈ اِن پاکستان” ادویات پر عالمی اعتماد میں اضافے اور برآمدات کے نئے مواقع پیدا کرنے میں کلیدی کردار ادا کرے گی۔ انہوں نے مزید کہا کہ عالمی معیار کے مطابق ادویات کا تجزیہ شہریوں کی جانوں کے تحفظ کے لیے پہلی دفاعی لائن ہے اور حکومت غیر معیاری ادویات کے خاتمے کے لیے ریگولیٹری نظام کو مزید جدید بنانے کے لیے پُرعزم ہے۔