ایران کی آبنائے ہرمز کھولنے، جنگ کے خاتمے کیلئے نئی تجویز امریکا کو موصول

امریکہ کے ساتھ جاری شدید کشیدگی کے درمیان ایران نے بحران کے حل کے لیے ایک نئی سفارتی تجویز پیش کی ہے، جس میں جنگ کے خاتمے اور عالمی تجارت کے لیے انتہائی اہم ‘آبنائے ہرمز’ کو کھولنے کی پیشکش کی گئی ہے۔ تاہم، اس تجویز کی سب سے اہم شرط جوہری مذاکرات کو بعد کے مرحلے تک مؤخر کرنا ہے۔

باخبر ذرائع کے مطابق، یہ نئی تجویز پاکستانی ثالثوں کے ذریعے واشنگٹن تک پہنچائی گئی ہے۔ اس منصوبے میں تجویز دی گئی ہے کہ:
پہلے مرحلے میں آبنائے ہرمز کے بحران اور امریکی ناکہ بندی کے خاتمے پر توجہ دی جائے۔
جنگ بندی کو یا تو طویل مدت کے لیے بڑھایا جائے یا جنگ کے مستقل خاتمے پر اتفاق کیا جائے۔
انتہائی حساس ‘جوہری پروگرام’ سے متعلق مذاکرات کو فی الحال پس پشت ڈال کر مستقبل کے لیے اٹھا رکھا جائے۔
وائٹ ہاؤس نے اس تجویز کی وصولی کی تصدیق کر دی ہے۔ صدر ڈونلڈ ٹرمپ آج وائٹ ہاؤس کے سچوئیشن روم میں اپنی اعلیٰ قومی سلامتی اور خارجہ پالیسی ٹیم کے ساتھ ایک اہم اجلاس کریں گے، جس میں اس ایرانی پیشکش کا باریک بینی سے جائزہ لیا جائے گا۔تجزیہ کاروں کا کہنا ہے کہ صدر ٹرمپ کے لیے یہ ایک مشکل فیصلہ ہو سکتا ہے۔ اگر وہ جنگ کے خاتمے اور ناکہ بندی ختم کرنے پر راضی ہو جاتے ہیں، تو وہ وہ سیاسی اور سفارتی دباؤ کھو سکتے ہیں جس کے ذریعے وہ ایران کو یورینیم کی افزودگی روکنے اور ذخائر ختم کرنے پر مجبور کرنا چاہتے ہیں۔ دوسری جانب، ایرانی قیادت کے اندر بھی اس بات پر اختلافات پائے جاتے ہیں کہ جوہری پروگرام پر کس حد تک سمجھوتہ کیا جائے۔
فی الوقت عالمی برادری کی نظریں وائٹ ہاؤس کے اجلاس پر جمی ہیں، کیونکہ اس فیصلے کے اثرات نہ صرف خطے بلکہ عالمی معیشت اور توانائی کی ترسیل پر بھی مرتب ہوں گے۔