پی ایس ایل 11: لاہور قلندرز باہر، حیدرآباد کنگز مین پلے آف میں پہنچ گئی

ایچ بی ایل پی ایس ایل گیارہ میں حیدرآباد کنگز مین نے راولپنڈیز کو ایک سو آٹھ رنز سے شکست دے کر پلے آف مرحلے کے لیے کوالیفائی کرلیا، جبکہ دفاعی چیمپئن لاہور قلندرز ایونٹ سے باہر ہوگئی۔

کراچی کے نیشنل بینک اسٹیڈیم میں کھیلے گئے میچ میں راولپنڈیز نے ٹاس جیت کر پہلے فیلڈنگ کا فیصلہ کیا۔

حیدرآباد کنگز مین نے پہلے بیٹنگ کرتے ہوئے مقررہ بیس اوورز میں چھ وکٹوں کے نقصان پر دو سو چوالیس رنز اسکور کیے۔ گلین میکسویل نے جارحانہ انداز اپناتے ہوئے سینتیس گیندوں پر ستر رنز بنائے۔

ان کے علاوہ عثمان خان چون رنز اور کوشال پریرا پچاس رنز بنا کر نمایاں رہے۔

دو سو پینتالیس رنز کے ہدف کے تعاقب میں راولپنڈیز کی پوری ٹیم سترہ اعشاریہ ایک اوورز میں ایک سو چھتیس رنز پر ڈھیر ہوگئی۔

راولپنڈیز کی جانب سے عثمان خواجہ نے مزاحمت کرتے ہوئے چھیاسٹھ رنز بنائے اور ناٹ آؤٹ رہے، تاہم انہیں دوسرے اینڈ سے کوئی مدد نہ مل سکی۔

حیدرآباد کنگز مین کی جانب سے حنین شاہ نے چار جبکہ عاکف جاوید نے تین کھلاڑیوں کو آؤٹ کیا۔