سندھ حکومت کی 7 لاکھ 67 ہزار میٹرک ٹن اضافی چینی برآمد کرنے کی سفارش، وفاق کو فیصلے سے آگاہ کر دیا

سندھ حکومت نے ملک میں چینی کے وافر ذخائر کے پیشِ نظر 7 لاکھ 67 ہزار میٹرک ٹن اضافی چینی برآمد کرنے کی باقاعدہ سفارش کر دی ہے۔ سندھ کابینہ نے محکمہ زراعت کی جانب سے ارسال کی گئی سمری کی منظوری دیتے ہوئے وفاقی حکومت کو اپنے فیصلے سے آگاہ کر دیا ہے۔

محکمہ زراعت کی بریفنگ کے مطابق، حالیہ کرشنگ سیزن میں ملک بھر میں 76 لاکھ میٹرک ٹن چینی پیدا ہوئی ہے، جبکہ جون 2026 تک چقندر سے مزید 0.086 ملین میٹرک ٹن چینی کی پیداوار متوقع ہے۔ اس وقت ملک میں چینی کے مجموعی اسٹاک 7.958 ملین میٹرک ٹن تک پہنچ چکے ہیں۔ سمری میں بتایا گیا ہے کہ آئندہ 12 ماہ کے دوران پاکستان میں چینی کی متوقع کھپت 6.638 ملین میٹرک ٹن ہوگی، جس کے بعد اسٹریٹجک ریزرو نکال کر بھی بھاری مقدار میں اضافی چینی دستیاب ہے۔

واضح رہے کہ 11 اپریل کو وزارتِ صنعت و پیداوار کے اجلاس میں چینی کے اسٹاک کی تصدیق پر عدم اعتماد کا اظہار کیا گیا تھا، جس کے بعد وفاقی حکومت نے اسٹیک ہولڈرز کی رضامندی سے ان ذخائر کا ‘تھرڈ پارٹی آڈٹ’ کرانے کا فیصلہ کیا ہے۔ سندھ حکومت کی اس سفارش کے بعد اب حتمی فیصلہ وفاقی حکومت کرے گی، جس کے بعد شوگر ملز کو چینی ایکسپورٹ کرنے کی اجازت ملنے کا امکان ہے۔